Local Administration Department Minister Pu P.C. Lalthanliana chuan vawiin chawhma khan Serchhip Dawngzawl rama Serchhip District Park siam mek a tlawh a, tui harsatna avanga Park hawn anih theih loh chhan te a enfiah a ni.

Serchhip District Park ah hian Swimming Pool pahnih, Artificial Lake pakhat, Chawlhbuk engemaw zat leh Choka, Dining Hall/Recreation Hall, Chowkidar chenna quarters etc., a awm a, tui lak kawngah harsatna a awm avangin Swimming Pool leh Artificial Lake ah te tui a dah theih loh a, hei vang hian hawn theih a la ni rih lo a ni.

Serchhip District Park a hman tur tui hi District Park atanga Kilometre 3.5 a hla Bawngchawm Tlang atanga lak a ngai a, tuilakna tur hi a hlat tham deuh avangin hemi atana sum ruahman lawk sa Rs. Nuaih 7 chuan a daih lo ani tih Contractor ten an sawi chu ngaihthlak sakin Minister chuan District Park chu a rang thei ang bera mipuite hman theih tura hawn a duh thu a hrilh a, an sum neih sa chuan a theih chin chin hma lo la turin a hrilh a, an daih chin bak chu Sawrkarin Department kaltlangin a thawh chhunzawm mai dawn thu a hrilh a ni.

Serchhip District Park hi Serchhip atanga Kilometre 8 vel a hla, Dawngzawl ram, National Highway-54 kawngpui bul a awm a ni a, National Buildings Construction Corporation (NBCC) Ltd. hnuaiah M.V. OMNI Project (INDIA) Ltd. ten a siam hna hi an thawk a ni.

Minister hian District Park ah hian tukthuan a ei a, hemi hnu hian Thenzawla Tribal Girls Hostel, NEC sum hmanga sak mek chu a tlawh a ni.