Vawiin (July ni 14, 2016) khan Lawngtlai Divisional Horticulture Office ruahmannain Chawntlangpui khuaa theihai chingtute thar chhuah kawlchawhai pum 2800 chu Aizawl leh Lunglei a zawrh atan thawn chhuah a ni a. He’ng theihai thawn chhuahte hi LADC Chairman Pu V.Zirsanga, Paithar bialtu MDC chuan a vai liam.

Hemi puala zing dar 9-a Chawntlangpui bazar shed-a inkhawm tawi buatsaihah Khuallian Pu V.Zirsanga chuan Chawntlangpuiin theihai thar chhuah lama Mizoram pum hriata hming an chher chu lawmawm a tih thu a sawi a. Hlawhtling turin teirei peih leh beih fat fat a pawimawh tih sawiin, mi hriat lem lohva kan lo tih tang tang chuan mite hmuhah kan hlawhtlinna a la lang chhuak ngei dawn a ni, a ti. Mizo zingah thawkrim hmasa lova hausak tum nghal ngawt kan tam thin thu sawiin, chuti ang ni lo va, fate hmakhua tur thlir chunga taima taka thawh a pawimawh ber a ni, a ti.

He inkhawm hi Chawntlangpui VC Member Pu V.Rinkima’n kaihruaiin, Lawngtlai Area BCM Executive Secretary Rev. R.Lalbiakliana’n hunserh a hmang a. Lawngtlai Divisional Horticulture Officer Pu L.Lalhmingmawia Pachuau chuan report pein, Lawngtlai leh a chhehvel khuaa theihai chingtute’n theihai hralhna lama harsatna an tawh mek tanpuina chi khat atana he’ng theihaite hi department motor (Pick-up) hmanga thawn chhuahsak an nih thu a sawi a. An bial chhung atangin Best Horticulture Farmer of the Year atana Pu Lalbiakdika, Chawntlangpui thlan a ni chu lawmawm a tih thu a sawi bawk.

He hunah hian LADC lam official te, DHO office-a officer leh staff te, chanchinbu mi te, Chawntlangpui khawtlang hruaitute leh theihai chingtute an tel a ni.

Lawngtlai DHO atang hian kumin atan Chawntlangpuia chhungkaw 79 chu Mission for Integrated Development of Horticulture (MIDH) leh NLUP hnuaiah theihai ching tura thlan niin, theihai tiak polypot 23,000 (singhnih sangthum) sem chhuah a ni a. He’ng theihai tiakte hi Rs nuai 10 velin Chawntlangpuia theihai chingtute hnen atang bawk hian lak a ni. Lawngtlai DHO hma laknain Chawntlangpuiah hian theihai nget enkawl dan training buatsaih tawh niin, a ziak leh damdawi pawh sem nghal a ni a. He’ng bakah hian, MGNREGA atangin a hmun samna an hmu bawk a ni.