No.3893/2020-2021

Lawngtlai, Thlazing ni 7, 2020: Vawiin chawhma dar 11 khan 10th Lai Autonomous District Council (LADC)-a Executive Member (EM) atana ruat thar, 9-Bualpui (NG) East bialtu Member of District Council (MDC) Pu K. Vanlalsanga chu Lawngtlai DC Conference Hall-ah Lawngtlai Bawrhsap Dr Andrew H. Vanlaldika, MCS chuan rinawmna thu tiamtirin a la lut.

Lak luh inkhawm hi LADC-a Executive Secretary Pu H. Lalramenga'n kaihruaiin, EM atana Pu K. Vanlalsanga ruat a nihna Mizoram sawrkar notification a chhiar chhuak a. Hemi hnu hian Lawngtlai Bawrhsap chuan Pu K. Vanlalsanga chu thu tiamtirin, LADC-a EM ni turin a la lut nghal a ni.

Vawiina EM thar lak luh inkhawmah hian Chief Executive Member (CEM) Pu T. Zakunga leh Chairman Pu V. Zirsanga te bakah, LADC-a mi pawimawhte leh sawm bik dangte an tel a. Heti hian LADC-a EM post pakua awm chu hnawh khah kim a ni.

Pu K. Vanlalsanga hi Adviser to CEM post chelh mektu a ni a. EM ni lai Pu Lallawmsanga Apetow chuan June ni 26, 2019-a EM atanga banna a theh luh hnuah, July ni 22, 2020 khan EM atan Pu K. Vanlalsanga ruat tura CEM rawtna chu Governor chuan a pawmpui a ni. Pu K. Vanlalsanga hian PHE, Industry leh Co-Operation Department te a enkawl dawn a ni.