850/2024-2025

2024 Nikir thla ni 18: Lai Autonomous District Council (LADC) hnuaia 12-Lawngtlai MDC Constituency-a June ni 27, 2024-a by-election neih tura chuh tumte hming pek luh theih hun chu vawiin tlai dar 3 khan tawpin, chuh tuma hming pe lut mi pathum an awm.

LADC hnuaia Lawngtlai Chandmary MDC biala by-election chuh tumte hian vawiin khan Returning Officer, Lawngtlai District Election Officer ni bawk Pu Cheemala Siva Gopal Reddy hnenah hming an pe lut a. Hming pe lutte hi -  Mizo National Front (MNF) candidate Pu C. Lalsawmzuala, Bharatiya Janata Party (BJP) candidate Pu K. Lalawmpuia leh Zoram People's Movement (ZPM) candidate Pu F. Hrangtukhuma te an ni.

Lawngtlai Chandmary MDC bial hi a bialtu, Dr Lorrain Lalpekliana Chinzah chuan Mizoram state legislative assembly inthlanpui, 2023-ah Lawngtlai East bial aṭanga MLA-a thlan tlin a nih hnuah a chhuahsan a; bial ruak a nih tak avangin Mizoram State Election Commission chuan by-election nei turin ruahmanna a siam ta a ni.

MDC by-election chuh tuma hming pe lutte nomination paper hi naktuk, June ni 19, 2024 (Nilaini) tlai dar 3:00-ah Returning Officer hovin endikna (scrutiny) kalpui a ni ang a. June ni 21, 2024 (Zirtawpni) chawhnu dar 1:00 thleng inhnuh dawhna hun hawn a ni ang.

Ruahman lawk dan chuan June ni 27, 2024 (Ningani) zing dar 7:00 leh tlai dar 5:00 inkarah vote thlak a ni ang a. Vote tlate hi July ni 1, 2024 (Thawhṭanni)-ah chhiar a ni ang.