1276/2023-2024

2023 Vawkhniahzawn thla ni 27: Mizoram State Election Commission (SEC) chuan Lai Autonomous District Council (LADC) hnuaia village council (VC) pasarih (7)-a hmun ruak hnawh khah nana by-election neih hun atan thla thar August ni 22, 2023 a ruat fel a. Hriattirna hi ni 26 (Thawhlehni) khan tihchhuah a ni.

He VC by-election atan hian inbuatsaihna hrang hrang kalpui nghal niin, inthlanna buaipui tura ruatte chu vawiin khan Lawngtlai DC Conference Hall-ah inthlanna buaipui dan tur zirtirna (training) pek an ni a. He hun kaihruaitu Election Officer Pu Denny Lalchhuanawma chuan inthlanna felfai, dik leh rin tlak a awm theih nan inthlan buaipuitute'n theih tawp an chhuah a pawimawh thu a sawi a. Master Trainer, Sub-Deputy Commissioner pahnih Pu Samuel Lalmalsawma Sailo leh Dr Doris Lalrinawmi te'n hriat tur pawimawhte zirtirin, hriat fiah loh awmte inhrilhfiahna hun hman a ni.

By-election hi LADC hnuaia VC 7-a general seat 7 leh reserved seat 1 hnawh khahna tura ruahman a ni a. LADC huam chhunga Nghalimlui, Dumzautlang, Kakichhuah, Chamdurtlang-II, Lawngtlai Electric Veng leh Lawngtlai Bazar-ah te general seat 1 ṭheuh hnawh khah tur awmin, Kawnkhuaah general leh reserved seat 1 ve ve hnawh khah tur a awm.

He by-election-a chuh tumte tan August 1, 2023 thleng hming a pek luh theih dawn a. Hming pek luhte hi August 2, 2023-ah endik a ni ang a, chuh tuma hming pe lut, endikna pal tlang, inhnuk dawk duh tan August 4, 2023 thleng hun hawn a ni a. August 22, 2023 zing dar 7 aṭanga tlai dar 5 inkarah vote thlak a ni ang a, vote tlate hi chhiar nghal niin, inthlan ṭhat ngai a awm chuan August 23, 2023-ah inthlan ṭhat a ni ang a. Inthlan pumpui hi August 25, 2023-a zawh fel turin State Election Commission chuan a ruahman a ni.