State Election Commission, Mizoram chuan Lai Autonomous District Council (LADC) inthlanpui lo awm turah inthlan ni a lirthei hman dan tur thupek a tichhuak.

Inthlanni ah hian candidate leh an agent te leh midang tute pawhin voter phurhna turin motor hire emaw a thar lei emaw a khap a. Inthlan ni ah hian Candidate-te hian anmahni hman tur motor pakhat bakah an agent leh party worker te chuanna tur motor dang pakhat kawl phalsak an ni.

Candidate te hian thuneitute hnenah an lirtheite an register ngei tur a ni a. Returning Officer in rawng pawl (blue colour) a siam motor hman phalna permit a pek chu langsar takin an tar tur a ni. Minister, CEM, EM, MDC, party worker, agent leh candidate lam tang tute pawhin inthlan ni-ah motor hman phal a nilo. Motor hman phalna hi inthlan ni, polling day hma ni hnih hmalamah neih fel vek tur a ni.

Candidate, agent leh party worker-te hian lirthei ke pali emaw ke pahnih nei emaw an hmang thei a. Lirthei pakhatah Driver tiamin mi panga aia tam chuan phal a nilo. Inthlan ni hian Candidate emaw a agent hnena motor hman phalna permit pekchhuah hi midang hman ve phal a nilo.

Vote thlak zawh hun tiam atanga chhiar leta darkar 24 atanga vote thlak zawh thleng he thupek hi hman tur a ni a. Sawrkar hnathawk duty lai bakah damlo, tar leh, rualbanlo phur motor te erawh a huam lovang.

Inthlan ni-ah hian mimal lirthei neiten inthlan kaihhnawih nilo anmahni mimal thila lirthei an hman phalsak an ni a. Anmahni emaw an chhungten inthlanna hmun polling booth pan nan an hman pawh phalsak niin polling booth atanga metre 200 huamchhungah erawh luh phalsak an nilo. Hospital motor te, ambulance, bawnghnute phur motor, tui phur motor, electric emergency duty van, police motor, election duty, terminal pangngai zawha tlan bus te chu an tlan dan pangngaia tlan phalsak an ni a. Taxi, three/two wheeler, rickshaw te pawh bus stand leh hospital pan nan bakah zinchhuak turte tan hman phalsak an ni. Mimal lirthei pawh damlo leh rualbanlote phurh nan hman phal a ni bawk.

State Election Commission chuan candidate thlawptu ten puakthei thil, silai leh danin a khap thil dang an pai ruk loh nan leh dan bawhchhiatna lam hawi engmah an tih lohna turin District Adminstration chu uluk taka heng mite chetvel dan thlithlai turin a hriattir a. Voter-te tithlabar thei tur emaw, vantlang duhloh zawng thil ti an awm anih chuan an lirthei hmanlai te hi District thuneituten man sakin election zawh hma chu pek chhuah an ni lovang. Lirthei neitu leh a chhunga chuangte bakah candidate thlengin dan anga hrem tur an ni bawk ang.