Minister lawmpuina hun hi Dr C. Zarzosangi'n a kaihhruai a, Rev C. Lalawmpuia, Chaplain chuan tawngtaina hun hmangin, Dr B. Zonunsanga'n Welcome Speech a sawi.
Dr Irene Lalbiaknungi'n Minister leh a nupui Dr Zochhuanawmi te hnenah lawmpuina leh duhsakna thilpek a hlan.
Dr K. Beichhua, Hon'ble Minister of State chuan thusawiin, "Kum 18 kalta ka ngaituah letin, he Hospital in nasa taka hma a sawn ka hmuh in ka hnuk a ulh hial a ni," a ti a, Pathian kaihhruaina leh thawktute thawhrimna zara Hospital changtlung tak an nei tak avangin lawmawm a tih thu a sawi bawk.
Minister chuan sawi chhunzawmin, "Pathian duhzawnga hna kan thawk phawt chuan hlawhtlinna chuan min zui mai thin. Damloh mangangte hmangaihna nen enkawl a, thi mai turte nunna chhanchhuah rawngbawl hna tluka ropui leh a dawngtu tan lawmawm hi a awm leh chuan ka ring lo. Chutianga he Hospital a thawktute thahnemngaihna leh inpekna rah chu he Hospital tan hian malsawmna tam tak thlentu a ni," a ti.
Thawktute chu fuihin, "In thlen chin a lawmawm a, mahse in thlen chinah hian lungawi mai suh u. Hmachhawp leh hmasawnna tur tam tak a la awm a ni," tiin, a theih ang anga he Hospital tan hma a lak ve zel tur thu a sawi bawk.
LCMC & Hospital hi 19th September, 2001 khan Lawngtlai Barzarah din tan niin, a tirah chuan Damdawi dawr atanga tan a ni. Dr K. Beichhua leh a nupui Dr Zochhuanawmi te chuan Hospital hi bultanpuiin, theihtawpin an enkawl chho a, Hospital chuan hmasawn hret hretin tun dinhmun hi an thleng ta a ni.
Tuna an luah tak Hospital Building, Lawngtlai College Veng ami hi 14th February, 2019 khan hawn a ni a, khum 65 leh Cabin 11 lai a awmin; Doctor 5, Nurse 29, Technician 7, Pharmacist 1 leh Thawktu dang 44; an zavaiin Staff 86 an awm mek.
Rev C. Hrangzuala chuan lawmthu sawina leh malsawm tawngtaina in he lawmpuina programme hi a khar a, Minister te nupa hian Hospital Room leh Ward hrang hrang te chu a tlawhkual nghal bawk. He Hospital changtlung tak hi Lairam Isua Krista Baptist Kohhran (LIKBK) te'n an din leh enkawl a ni.
Superintendent leh Staff te'n Minister te nupa leh tawiawmtute puala zanriah tui tak an buatsaihsak chu hlim taka kilho a ni.
He Programme ah hian Pu Rozawna, Joint Director, Sericulture; Pu H. Ramdinliana, Member, Veterinary & Fisheries Board; Pu Lalthankima, AE, SWD; Pi B. Malsawmtluangi, SDO (S) Siaha District; Pu Abraham Beirazi Khithie, PS to Minister & Under Secretary, SWD leh MNF Siaha District Headquarters hruaitu thenkhat te'n Minister hi an tawiawm a, LCMC & Hospital Staff te pawh an kim tha hle.
Attachment
- Loading attachment...
