Vawiin khan Art & Culture Department huaihawtin Archives Hall, Babutlang-ah Pu Sikulsanga (Lalsangluaia Pa) Hla Tharte Aihna Hun hman a ni a, Art & Culture Minister Pu P.C. Zoramsangliana chu Khuallian chan changin heng hla tharte hi a aihsak a ni.

Hla Aihna Hun Art & Culture Director Pu Ngurbiaka kaihhruaiah Minister chuan kum 100 chuang liam hnuin Mizoten Pi Pu Zai thluka sak chi hla thar tha tak tak 18 lai aih tur kan nei leh ta chu a vanneihthlak hle a, Mizote tan ni chhinchhiah tlak tak a ni, a ti. Pu Sikulsanga hla phuahte chu a rilin, Mizo zemawi a phochhuak hle a, Mizo literature ti hausa belhtu a nih rualin thangtharte tan pawh chona a tling a ni, a ti bawk. Nakkum Chapchar Kut lawmnaah hla tharin Mizo mipuite awi theih an nih tur chu a lawmawm hle a ni tiin Pu Zoramsangliana chuan kan hnam hla leh thute ti ropuitu tur chu hnam dang ni lovin Mizote bawk hi kan ni, a ti. Hla thar phuahtu Pu Sikulsanga chungah lawmthu sawiin Minister chuan duhsakna sang ber a hlan a ni.

‘Lalsangluaia Pa Hla Thar te’ tia hlawmkhawm hla 18 lai phuahtu Pu Sikulsanga Chenkual hi Project Veng, Kolasib-a cheng mek a ni a. Heng Hla Tharte hi tunlai khawsak dan mila phuah, pipu zai thluk veka sak theih an ni hlawm a ni. Vawiin Hla Tharte Aihna Hun hman takah hian Art & Culture hnuaia Institute of Music & Fine Arts zirlaite leh Mizo Cultural Artistes’ Association ten Lalsangluaia Pa Hla Thar engemawzat an sak bakah ‘Pawhlohtlawh lam’ an entir bawk a ni.

Lalsangluaia Pa Hla Tharte Aihna Hunah hian Art & Culture Department bakah Mizo Academy of Letters, Mizo Cultural Organisation, Mizoram University-a Mizo Department leh thu leh hla lama tui mi engemawzat an tel a ni.