No.7201/2020-2021

Vawiin hian Serchhip DC Conference Hall ah Lamliana Fimkhur Thla (32nd Road Safety Month), 2021 hawnna hun buatsaih a ni a, Pu Lalmuansanga Ralte, MCS, Addl. DC chu khuallian a ni.

Pu Lalmuansanga Ralte chuan, kum dangah chuan Road Safety Week tiin hapta khat awh tura hman thin a ni a, nimahsela kumin atang chuan sawrkar laipui chuan hapta mai duh tawk lovin thla khat hmang turin ruahmanna a rawn siam tih a sawi a. India ram chu khawvela lirthei chunga thihna za zela 6 hauh phak a ni a, kum tin nunna leh bungrua tam tak kan chan a, chuvang chuan kawngpuia himna hi kan ngaihpawimawh deuh deuh a tul tak zet a ni, a ti. Mizoramah pawh lirtheia chetsualna a awm fova, heng chhiatna laka kan him theih nana pawimawh ber chu fimkhurna leh dan zawmna a ni tih sawiin, khualzin phur thin lirthei khalhtute phei chu kawnga an lirthei khalhah mai nilova an incheina te, an tawngkamte thlenga fimkhur tur an ni, a ti. Lamliana fimkhur thla kan hman hi inhrilhhriat tharna ang hun mai a ni a, nitinin kum tluanin fimkhur takin lirtheite kan hmangin, kawngpui pawh him takin kan enkawl zawk tur a ni, tiin kalkhawmte a chah a ni.

He hunah hian Pu PC. Laltanpuia, MPS, Addl. SP in Traffic Rules zawm pawimawhna a sawi a, Traffic Rules chu dan zawm harsa leh khirh a ni lova, lirthei khalhtute leh kawnga kal zawng zawngte tana kan him tlanna tur dan zawm nuam tak zawk a ni a, mitinin kan zawm ngei zawk tur a ni, tiin a sawi. Tin, Pu Lalrohlua, MVI pawhin lirthei Insurance leh Motor Accident Claim dan tlangpui sawifiahna a nei bawk.

Road Sadety  Month, 2021 hawnna inkhawm hi Pu Lalengthanga Hnamte, DTO Serchhip in a kaihruaia, Pi R. Lalmuankimi, Superintendent, DC in lawmthu sawiin hun a khar a ni. 

Kumina Road Safety Month hi vawi 32 na a ni a, thupui hi, "Fimkhur la, Nun humhim rawh" tih a ni a, vawiin ni 18 January   atanga 17th February, 2021 thleng kalpui tur a ni.