1163/2025-2026

Aizawl, the 14th July, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Champhai District a tlawh a, Sawrkar Department hotute meeting a neihpui bakah Assam Rifles COB, Champhai tlawhin AR hotute a kawm bawk.

Larsap hi Champhai Helipad-ah District Bawrhsap Pu Mohammad Aaquib leh Addl. SP Pu Victor Zothansanga te'n lo dawngsawngin guard of honour pek a ni a. Hemi hnu hian DC Conference Hall, Keifangtlangah Sawrkar Department hotute meeting a neihpui a ni.

Larsap General (Dr) Vijay Kumar Singh (Retd) chuan Sawrkar department te'n mipuite hmasawn nana theihtawp an chhuah chu lawmawm a tih thu sawiin, tihtur leh hmabak tam tak a la awm avangin hmasawn zel tura tanlak erawh angai a ni, a ti a. Sawrkar laipui scheme pawimawh hrang hrangte tarlangin, mipuite'n an chhawr tangkai theih nana tanlak a tul thu leh inzirtirna zau zawk neih a tul thu a sawi a. Raltlante tha taka chhinchhiah zel a tul thu sawiin, resource kan neih tam bik loh avangin nakin zela kan khawtlang leh ramah nghawng tha lo a thlen loh nan kan lo inpuahchak lawk a tul a ni, a ti a. Champhai chu ramri kaltlanga drug tawlh rukna lian tak a nih thu leh drug hman sualin khawtlangah nghawng tha lo tak a thlen mek thu sawiin, drug do let kawngah tanrual a ngai a, a tawlhru thinte man chhuaha an phu tawk hremna pek zel a tul thu a sawi bawk.

Larsap chuan zirna ngaihpawimawh a tul thu leh zirna inte chu zirlaite tana ngainatawm taka siam a tul tih sawiin, India ram exam hautak leh hnalak lian thamahte Mizote kan lan tam theih nana theihtawp chhuah a tul thu a sawi a. Champhai District-ah PM-Kisan Samman Nidhi hamthatna dawngtu an tam chu lawmawm tiin, Farmer Producer Organization (FPO) tam zawk din a tul thu leh organic thlai tam zawk thar chhuak thei tura hmalak a tul thu a sawi a. Rooftop solar scheme, bawlhhlawh sawngbawl, thlai thar sawngbawl bakah hriselna kawnga scheme pawimawh tak tak - Ayushman Card, Jan Aushadhi leh Health & Welness Centre-te chhawr tangkai thiam a tul thu leh, School leh Anganwadi-ahte eitur hrisel chauh sem a tul thu a sawi a. Khuarel chhiatnate'n nghawng nasa zawk a thlen loh nana invenlawk thiam a pawimawh thu sawiin, hmasawnna hnathawh kawngah Sawrkar department-te chu thawhhona (convergence) ngaipawimawh turin a chah bawk.

He hunah hian Champhai District Bawrhsap Pu Mohammad Aaquib chuan inlawmna thu sawiin, Champhai district-in tunhnai fur ruah tla nasa avanga chhiatna a tawh leh hmalak dante a tarlang a. Tunhnaiah Myanmar ramria inkahna thleng avanga raltlan 4,653 lai Champhai District-ah an luh thu sawiin, raltlan buaipui kawngah lungrual taka theihtawp chhuah a nih dante a tarlang a. Ramri depa awm Champhai District-ah drug leh dan lova ramri kana thiltih te tha tlah lova do a tul thu a sawi bawk.

Meeting-ah hian Pu Lalchhuanawma Ralte, SDC chuan Champhai District administration, security dinhmun leh Department hrang hrang hmalaknate PowerPoint Presentation hmangin a sawifiah a. Pu K. Zorammuana, Addl. DC in lawmthu sawiin hun hman a khar a ni.

Hemi hnu hian Larsap chuan Assam Rifles COB, Champhai tlawhin Brig Pushpendar Sorayan, DIG, HQ 23 Sector Assam Rifles leh hotu dangte a kawm a, an hmalaknate Larsap hi an lo hrilhfiah a. Mizoram Ex-Services Leaque (MESL) hotute'n an kawm bawk.