Vairengte khawtlang ngenna angin Larsap Lt.Gen. Nirbhay Sharma (Rtd.) chuan hma la nghal in nimin ah khan Commanding Officer Maj. Gen.Vivek Sehgal chu bia in Vairengte khawtlang tibuai tu a puh Col. Ravindra Singh chungchang chhui chiang tur leh Vairengte mipui te ngenna tihhlawhtlin a nih theih nana hma la turin a ngen a. CIJWS hotute hian Col. Ravindra Singh hi vawiin ni la la khan Guwahati ah transfer nghal in a chungchang pawh chhuizui nghal a ni dawn tih Larsap an hrilh a ni.

Vairengte khawtlang leh CIJWS te rilru inhmu taka an awm chhunzawm zel Larsap chuan a duhthu a sawi a. Hemi chungchang sawipui tur hian Larsap chuan Mizoram Police DGP Pu Thianghlima Pachuau pawh a pisa ah vawiin khan a ko a ni. Vairengte Joint YMA in Larsap hnena ngenna an siam a tarlan dan chuan Col. Ravindra Singh, CIJWs hian an khawtlang a zah loh bakah mimal thleng pawh tibuai duh leh zelin Vairengte khaw mipuite tithlabar zawngin buaina a siam thin an ti a. Col. Ravindra Singh lakah tho hian Col.Kuldeep Singh Kalsi, CIJWS chuan chhan neilova amah kutthlak ni a sawiin Vaireng Police Station ah FIR July 4, 2015 khan a lo thehlut tawh bawk.

Vairengte khawtlang hruaitute chuan an ngenna tihhlawhtlin saktu Larsap Lt.Gen. Nirbhay Sharma (Rtd.) chungah lawmthu sawiin CIJWS leh an khawtlang chu tunhma atang tawh a lo inpawh taka awm ho a nih thu leh inrem taka khawsak ho zel an duh thu an tar lang.