Town Official Language Implementation Committee (TOLIC) buatsaih,  Hindi Ni lawmna inkhawm, I & PR Auditorium-a neih chu vawiin khah Mizoram Larsap Lt. General(Rtd.) M. M. Lakhera'n a hmanpui.

Larsap chuan kum li  Mizoram a awm chhungin mipuite, a bikin naupang te zingah Hindi tawng zir chakna a piang thar nasa tih a mit ngeia a hmu chu  lawmawm a tih thu sawiin tawng dang zirin mahni hnam tawng, hnam zia leh nunphung tiderthawng leh hlamchhiah tir thei anga mi thenkhatin  ngaihdan an nei chu ngaihdan diklo a ni, a ti a. India chakna leh ropuina chu hnam hrang hrang te zia rang leh tawng te hi a ni a ti. Larsap chuan mi in a hnam ziarang  a chawikan leh pholan theihna tha tak chu tawng danga lehlin a ni, tiin Hindi hi India mi tam zawkin an hman avangin Mizoram chanchin leh a mi chengte nunphung Hindi tawnga dah a nih chuan India mi tam zawk ten Mizoram leh Mizo te chanchin an hre zau thei zawk dawn a ni, a ti bawk.

Larsap chuan Saptawng a lar chhan chu tawng awl leh tawng dang atanga thumal an sengluh hnem vang a ni, tiin mipuiin awlsam taka Hindi an zir theih nan Hindi thuziakmite leh zirtirtu te chu thumal hriat awlsam te hmang uar thin turin a chah a.  

He inkhawm-ah hian Larsap chuan Aizawl-a, Sawrkar laipui pisa a thawkte, Prabodh, Praveen leh Pragya Exam pass te chu chawimawina a hlan a. DDG All India Radio(NER-II) & Director, DDK Aizawl  Pu C. Lalrosanga,  Chairman , Town Official Language Implementation Committee (TOLIC) Aizawl ni bawk chuan  thuhma sawiin Pu R. K. Dhamija, Director, Khadi & Village Industries Aizawl chuan Hindi Ni puala  Union Home Minister Pu P. Chidambaram-a  thuchah a chhiar a ni.