Larsap Lt. Gen. (Rtd) M M Lakhera PVSM, AVSM, VSM chuan nimin tlai khan Tourist Lodge, Chaltlangah nithum awh tur (23rd - 25th May)  mit leh mit natna (Community Ophthalmology) chungchanga ram pum huap mit doctor  te inhmuhkhawmna leh zirhona, 'Third National Continuing Medical Education Programme' chu a hawng a.  He Programme thupui chu Glaucoma & Cataract Amongst Unreached Population niin Association of Community Ophthalmologists' of India (ACON) in a buatsaih a ni.

Larsap chuan hmun hrang hrang atanga lo kal mit lama mithiam bikte chu lo lawmin, Conference hian thiamna intawmpui leh zirhona hun tha tak a ni thei tih a sawi a. Mizoram anga state kilkhawr a taka an rawn hmuh theihna leh a ralmuan zia hmua anmahni state theuhva  Mizoram chanchin a tha zawnga sawi thei mi pawimawh tak an nih thu a sawi bawk.   Kum zabi sangthum hma lama India mithiam  - Charak leh Sushruta ten hriselna lama thiamna ropui tak an lo neih tawh chanchin sawiin Larsap chuan hun hma lamah India thiamna chu a ropui thin a ti a, tunlai mithiamten  chu thiamna chu haia zir leh nachang an hre lo chu pawi a tih thu a sawi. He programme peng khat Survey leh Field Study chu Mizoram mipui zinga mit lama harsatna nei te tan malsawmna a nih theih thu a sawi bawk a ni.

Larsap chuan India in hmasawnna, a bikin science, lamah ke kan pen chak thu sawiin ram hrang hrang atangin damlo ten India an pan thin thu a tarlang a; chutihrualin a ram mipui tam zawk ten enkawlna tha leh tlawm an nei thei lo chu vanduaithlak a tih thu  a sawi. Khawtlang a 'a nei' (haves) leh 'a nei lo' (have nots) inkar a hlat avanga, 'a nei lo' ten hlamchhiah a an inngai thin chuan ralmuan lohna leh inepna a thlen fo thin thu sawiin Larsap chuan doctor mithiamte chu hriselna kawngah mi hnuaihnung leh harsa zawk te ngaihsak bik turin a fuih a ni.

Larsap hian Mizorama mit hriselna leh natna chungchanga  thawk tha te chawimawina thuziak ACON-in an rawn buatsaih chu a sem a.Chawimawina dawngtu te chu - Er. Dunglena, Dr. Vanlalruata, Dr. K L Remsanga; Dr H C Thangkima; Pu Rohmingliana; Pu Lalrinkima(Ophthalmic Technician ve ve) leh Sr. Lalbeiseii, PC Synod Hospital te an ni.

Association of Community Ophthalmologists' of India (ACON) hi kum 2009 chho vela ding tan niin International Centre for Eye Health, London hnuaia in affiliate a ni a. Mit hriselna lamah pawl pawimawh tak niin ram pum huapin nasa takin hma an la mek a ni. Hawnna programme ah hian Col. Prof Madan Deshpande, Director H B Desai Eye Institute, Pune, President Elect ACON te; Prof. Amitabh Raychaudhuri leh Dr. F Lalrinthanga National Blindness Control Programme, Mizoram te bakah India hmun hrang hrang atangin Medical College a Ophthalmology Professor leh  eye specialist engmaw zat an tel a ni. Khawchhiat vangin nimin khan delegates tam tak chu Kolkata leh Guwahati Airport ah te an tang a, vawiin lamah tel tura beisei an ni.