28/2025-2026

Aizawl, the 3rd April, 2025: Mizoram Larsap, General (Dr) Vijay Kumar Singh, PVSM, AVSM, YSM (Retd) chuan vawiin khan kumin Republic Day lawmna pui ber, New Delhi-a neih taka Republic Day Camp (RDC) 2025 a tel Mizo NCC Cadet 6, mipa 4 leh hmeichhia 2 te chu Raj Bhavan-ah kawmin lawmpuina thilpek tablet a hlan.

Larsap General (Dr) Vijay Kumar Singh (Retd) chuan ngaihhlut hlawh tak Republic Day Camp-a telpha leh Mizoram tihmingthatu NCC Cadet 6 te chhuanawm a tih thu sawiin, midangte tana entawntlak leh NCC zawm an chak ve zel theih nana hmahruaitu nih tum turin a chah a. NCC chu hna zawn nana pawimawh tak a nih mai piah lama mitha leh chhawrtlak chherchhuaktu a ni, a ti a. NCC cadet-te chu tuna hlawhtlinna an chanah tawp mai lova, hmabak an neihte tha taka hlen tum tura fuihin, hlawhtlinna dangte pawh hmu zel thei tura tan la sauh sauh turin a chah a ni. 

Republic Day Camp 2025-a Mizoram atanga telte hi 1st Mizo Battalion NCC atangin Junior Under Officer Jacksy Lalhlimsangi leh Cadet Laltlanhlua, 2 Mizo Battalion NCC atangin Cadet Asraful Haque Laskar, 1st Mizo Air Squadron NCC atangin Cadet Rohit Kumar, Cadet F. Malsawmtluanga leh Cadet Lalremruati te an ni a. Ngaihhlut hlawh tak Kartavya Path, PM Rally, Line Area leh Youth Exchange Programme (Cultural) ahte an tel a ni.

Vawiin hun hmanah hian Colonel SS Kalia, Nodal Officer, NCC Mizoram & Commanding Officer, 1 Mizo Bn NCC, Wing Commander Lalrinsanga, Commanding Officer, 1 Mizo Air Squadron NCC-te an tel a ni.