1599/2025-2026

Aizawl, the 25th September, 2025: Vawiin khan Mizoram Larsap, General (Dr) Vijay Kumar Singh, PVSM, AVSM, YSM (Retd) chuan Social Welfare Department Commisioner & Secretary Pi Lalzarmawii leh hotu dangte chu Raj Bhavan-ah kawmin, department kaltlanga upate enkawlna kalpui dan leh pension pek dan chungchangte a sawipui a ni.

Larsap General (Dr) Vijay Kumar Singh chuan Mizo khawtlangin upate ngaihsaka a dah pawimawh thiam thin chu lawmawm a tih thu sawiin, kum upate chu a tlangpuiin chhungte nei leh enkawlna tha dawng ni mahse, baihvai an awm changa an tlukluh ngamna tur hmun changtlung tak neih a tul thu a sawi a. Mal ngawih ngawiha inhriatna leh tangkai lo ni a inngaih tlatnate nuaibo sak a tul tih sawiin, harsatna an tawhte ngai thlaa kaihruai turin councellor pek chu thil tih makmawh a ni, a ti a. Nu leh pate kalsan mai lova ngaiksaka hmangaih taka enkawl chu mitin mawhphurhna a nih thu sawiin, Social Welfare Department-in harsatna an tawh leh mamawh an thlente a tul ang zela bawhzui sak a tum thu a hrilh a ni.

He hunah hian Social Welfare Department atangin Pi Caroline Hmingthanzuali, Jt. Director leh Pi Zomuanpuii, Asst. Director te'n kum upate enkawlna leh upa pension chungchanga department hmalaknate PowerPoint Presentation hmangin an sawifiah a. Tarlan a nih danin Upa Pension (Indira Gandhi National Old Age Pension Scheme) hamthatna dawngtu Mizoramah mi 24,524 an awm mek a. Heng zingah hian kum 60-79 inkar mi 15,393 awmin monthly pension Rs 1,200 (Sawrkar laipui tum Rs 200 leh State Sawrkar tum Rs 1,000) an dawng a. Kum 80 chin chung lam mi 9,131 awm bawkin, monthly pension Rs 1,500 (Sawrkar laipui tum Rs 500 leh State Sawrkar tum Rs 1,000) an dawng a ni.

National Social Assistance Programme (NSAP) hnuaiah Aadhar seeding 97.96% leh mobile seeding 90% zawhfel tawh niin, Northeast state-a ti tha berte zingah Mizoram a tel a. The Mizoram Maintenance and Welfare of Parents and Senior Citizens Rules 2013, hnuaiah Sub-Division level-ah Maintenance Tribunal leh District level-ah Appellate Tribunal-te din niin, tun thlengin kum upate enkawlna kaihhnawih case lut a la awm lo a ni. Kum 1989 a din mi 10 awm theihna State Senior Citizens Home, Aizawlah mi 9 (mipa 6, hmeichhia 3) awm mekin thawktu 10 an awm a. Vawiin thlengin mi 79 (mipa 53, hmeichhia 26) te enkawl tawh niin, admit zinga upa ber chu kum 96 mi a ni.

Social Welfare Department hotute chuan Upa Pension dawng thei zat tur chu Sawrkar laipuiin a rawn bituk sa vek thu leh tun dinhmunah dilna 7,500 chuang khawl a nih tawh thute, thihna avangte a nih ngawt loh chuan hamthatna dawng tur a thar thlan a harsat thute Larsap hi hrilhin, tun aia hamthatna dawngtu tam zawk Mizoramin a neih theih nana hmalak a tul thute an thlen a. Upa Pension mai bakah National Social Assistance Programme (NSAP) hnuaia scheme dang - Indira Gandhi National Widow Pension Scheme (Hmeithai Pension), Indira Gandhi National Disability Pension Scheme (Vohbik Pension) leh National Family Benefit Scheme (Chhungkaw eizawngtu ber borala chhawmdawlna) hnuaia tanpuina pek thinah, state-in a tum ve tura tih chu April ni 1, 2024 ah state sawrkarin Rs 100/- atangin Rs 1,000/- ah a tihsan thu leh, hetiang bawk hian sawrkar laipui tum ve tur pawh tihsan a tul tawh thute Larsap hnenah hian an thlen a ni.

Meeting-ah hian upate enkawlna kalpui dan chungchang leh an tana hamthatna awmte buaipui kawnga hmalak tulte sawiho a ni a. Rilru lama harsatna an tawh loh nana Senior Citizens Home-a counselling service kalpui a tul thute, nakin zel atan tun aia changtlung leh lian zawk upate enkawlna home ruahman lawk a tul thute, day care centre, palliative care training leh tul dangte sawiho a ni bawk.

He hunah hian Pu Ajit Roy, Secretary to Governor bakah, Social Welfare Department atangin Addl. Secretary Pu Lalnunhlua, Jt. Secretary Pi Zonunthari leh official dangte an tel a ni.