2463/2025-2026

Aizawl, the 30th November, 2025: Mizoram Larsap General (Dr) Vijay Kumar Singh, PVSM, AVSM, YSM (Retd) leh Chief Minister Pu Lalduhoma te chuan vawiin khan Mizoram Catholic Kohhrante'n kum 100 an tlin lawmna puala kumtluana programme hrang hrang an kalpui kharna inkhawm, Bishop's House Compound, Ramthar Veng, Aizawla neih chu an telpui.

Larsap General (Dr) Vijay Kumar Singh chuan Mizoram Catholic Kohhranin kum 100 hmel a hmu ta chu lawmawm tiin mellung pawimawh tak a nih thu a sawi a. Kum 100 chuang kaltaa chanchintha kenga Mizorama lokal Missionary te'n Pathian thu mai ni lo, zirna, hriselna leh khawtlang nun chawikanna an rawn kentel thu sawiin, hemi rah chhuah hi tunah chuan hmuh theihin a awm mek a, kan inpumkhatna, ralmuanna leh inngaihsaktawnnate hi mite'n Mizoram an ngaihsanna chhhan a ni, a ti bawk.

Larsap chuan Catholic Kohhranin Mizoram khawtlang nun, rinna leh ngaihtuahna siam dik kawngah a thawh hlawk hle tih sawiin, vantlang rawngbawlna, hriselna, zirna leh Kohhran dang nena inremna leh thalaite tihhmasawn kawnga an hmalaknate fakawm a tih thu a sawi a. Mizoram Catholic Kohhran member-te chu kum 100 dang lo la awm tur thlir chunga inpekna nena rawngbawlna chhunzawm tura chahin, thalaite nun kawng dika hruai tura kaihhruaina tha pe turte, tunlai thiamnate hmang tangkai deuh deuh turte, muanna leh inpumkhatnate chawilar zel tur leh mirethei leh hnuaihnungte rawngbawl sak kawnga inpekna thar nei turtein a chah a ni.

Chief Minister Pu Lalduhoma chuan Mizoram Catholic Kohhran leh mipui zawng zawngte centenary chibai bukin, Catholic Kohhran avangin Mizoramin sawrkar din ni lo High School hmasa ber St. Paul's High School kan nei a, zirna in tha tak tak dang tam tak kan nei zui zel a, vawiinah chuan hengte Mizorama school tha ber ber an ni hlawm a, India rama zirna school tha ber berte hi he kohhran enkawlte an ni, a ti bawk.

Pu Lalduhoma chuan mirethei leh chanhaite chhawmdawlna kawnga Catholic Kohhran hmalakna fakawm tiin, Mizoramah pawh Zoram Entu Pawl (ZEP) kaltlanga hna ropui tak tak an thawh thin thu a sawi a. Catholic Kohhran member Mizo hnam tana mi hlu tak takte chanchin tarlangin, ram hruaitu leh mi hmingtha tam tak an chherchhuah thu a sawi a. Chief Minister chuan Mizoram tana hna ropui tak tak an thawh avangin an chungah state mipui aiawhin lawmthu a sawi a ni. 

He hun hi School Education Minister Dr. Vanlalthlana chuan a telpui bawk.

Mizoram Catholic Kohhran hi February 1, 1925 khan din a ni a. Tun dinhmunah hian member 20,000 chuang an awm a ni.