Mizoram State Law Commission chu vawiin khan Chairman Pu R.Lalrinawma hovin I&PR Conference Hall-ah an thukhawm a. Meeting hmasa a thurel te bawhzui a nih dan leh hma lak zui na turte sawi ho a ni.

Pu Lalrinawma chuan  Member hlui leh a tharte chibai bukin Mizoram sorkar-in Law Commission ah beiseina sang tak a nghat a ni, a ti a. Ram inrelbawlna atana Mizoram-in Dan a la neih loh te siam thar a, Dan awmsa siam that ngai te siam tha tur leh sorkar laipui in Dan a neih te hmang ve tura hma lak kawngah te Law Commission-in mawhphurhna sang tak a nei a ni, a ti a. Member te chu Zoram mipui tan an ngaihtuahna te senga hma la zel turin a ngen a. Law Commission hmalakna in nghawng tha a nei chho zel tih sawiin insurance policy-a motor neitu ten third party tan an chawi ngai thin leh copyright chungchanga mipuiten harsatna an tawh thin te chu chinfel mek a nih thu a tarlang.

He meeting ah hian Chief Minister leh Law Minister ten an ngaih pawimawh leh rawtna an thlen, Mizo Inneih, Inthen leh Rokhawm thua Dan siam chungchang  sawiho a ni a. Hemi chungchang hi meeting hmasa ah ngaihtuah a lo ni tawhin mithiam leh mi pawimawhte ngaihdan  pawh lak a ni a. Law Commission chuan tuna Mizo Customary Law hman mek chu famkim tawk lo leh tunlai hun nena inmil tawk lo tiin Dan siam that a lo rawt tawh a. Mizo Inneih, Inthen leh Rokhawm Dan thar duang turin sorkar-ah sum mawmawh te thlena hma lak ni se tiin vawiina Law Commission meeting chuan a rel a ni.

Kumin April 15 a Law Commission thu khawmin rawtna a siam angin The Mizoram  Swimming Pool Regulation Act, 2011 chu Local Administration Department in a duang tawh a, rei lo te ah hman theih beisei a ni tih he meeting ah hian in hriattir a ni.

Vanduaina avanga pawngsual tawkte sum leh paia chhawmdawlna tura sorkar-in remruatna a neih te  meeting ah hian in hriattir a ni a. Court-a thuhretu kal thinte TA/DA chu tun hnai khan tihsan a ni a. TA hi 1km ah pawisa 50 ni thin chu Rs.1.40 a tihsan a ni ta a. Ni khata DA Rs.20/- ni thin chu Rs.70/- ah tihsan a ni tawh bawk a ni. Transition of District Council Court Case in Mizoram chungchangah High Court leh Mizoram sorkar in indawr mek a, Law Commission chuan hei hi chak zawka kalpui tura sorkar ah thlen ni se, an ti a. Court-a thuhretu te inlan hi sual dona hmanraw pawimawh tak a nih avangin case hrang hranga witness te chu Court-a inlan ngei thin turin Law Commission chuan mipuite a ngen nghal a ni.

Section 144 Cr.P.C hnuaia khapna order chhuah chungchang ah Law Commission chuan District hrang hrang atangin report leh ngaihdan an dawng kim thawkhat tawh a. Fimkhur zawka he Dan hi hman a nih theih nan sorkar-ah rawtna thlen ni se, an ti.