Vawiin khan Mizoram State Law Commission meeting chu an Chairman, Pu John Siamkunga, MLA hovin a Office Chamber-ah an thukhawm a. Tun tum hi he Commission thutkhawm vawi 30-na a ni a, thu pawimawh tak tak an rel.

An thu rel zingah hian Mizorama The Limitation Act, 1963 hman chungchang a tel a, hei hi Court-a thubuai thehluh hun bithliah hrang hrang dan anga hman ve chungchang a ni. He dan hi tun hma zawng chuan a nih ang diak diak a hman a nilova, in hriatthiamna nen hman thin a ni. Amaherawhchu, he dan chungchang ah hian Supreme Court chuan September 8, 2015 khan thuremna tichhuakin Mizoram chhung District Council area tel lovin Tribal area a ni tawh lova, he dan hi hman tur a ni a ti ta a ni. Ram chhunga court sang berin hman tur a tih dan chu hman a ngaih tak thu sawiho a ni a, a nghawng tur thil te pawh sawiho a ni.

Hemi chungchang sawifiahtu Pu Zahmingthanga Ralte, Commission Secretary chuan meeting hmasa thu bawhzuiin department hrang hrang ah an dan hman lai te zirchian anih hnuah sawi duh an neih apiang an dil thu a sawi a, an comments erawh in duhthu a sam lo deuh niin a sawi. Committee a hriattir danin department ten in comments an pe tha hle a, department pali (4)- Home, Finance, I & PR leh Sports & Youth Affairs Department ten chhanna an pe lo thung. Thu dawn danin Finance Department hnuaiah hian dan thahnem tak hman tawh si loh, repeal ngai tam tak awma hriat a ni a, a changtu Department in comments an siam loh avang erawh chuan hmalak zel a ti harsa deuh a ni. Department thenkhat an tana dan awm reng hre miah lo pawh an awm.

Heng department dan hrang hrang te hi Law Commission member ten chik leh uluk zawka zir nise, department comments te chu a famkim tawk lo te awma hriat anih avangin zir chian ni bawk se, chumi hnuah member tin ten department hrang hrang te dan hman laia an ngaihdan te thawhkhawm leh ni se, chutah chuan department hrang hrang te hnenah thurawn pek nise an ti.