545/2022-2023
Champhai, the 19th May, 2022: Govt. Bungzung High School kum 50 tlin lawmna Golden Jubilee Celebration vawiina neih chu Law & Judicial Minister Pu T.J. Lalnuntluanga chuan khuallian niin a hmanpui a, East Tuipui bialtu MLA Pu Ramthanmawia, Vice Chairman, Bamboo Link Road Board chu khualzahawm a ni.

Khuallian Pu T.J. Lalnuntluanga chuan Govt. Bungzung High School-in Golden Jubilee lawm thei tura Pathian kaihhruaina an chang chu a lawmpui thu sawiin, ni chhenfakawm tak lawm thei tura thawkrim em em thin zirtirtute, zirlai, staff dangte leh khawtlang hruaitute hmalakna fakawm a ti a. Zirthiamna education kan tih chu din khawchhuah theih nana kawng tinrenga thiamna nei tura inzirtirna a ni tiin, lehkha thiam chauh emaw, kan zirlaia kan pass that chauh emaw hian hmasawnna a hawl kim tawk thin lo a ni, a ti a. Sikul atanga thiamna hrang hrang, zirlai bakah nunphung thlenga kan zir thin hian nun dan dik thui tak min kawhhmuh thin a ni, a ti a. Golden Jubilee hial hmang thei Govt. Bungzung High School atangin mihlawhling tak tak an chhuah nual tawh thu sawiin, mite tana eizawnna leh kaihruaitu tha tak petu school chu a upa telh telh anga a hlu tawlh tawlh dawn a, khawtlangin kan hlut thiam erawh a tul hle a ni, a ti.

Hmasawnna thlen turin sawrkar-in tan a lak reng lai leh, ram leh hnam dinchhuah nana ke a pen chhoh mek zel laia tunlai thiamna changkang leh chak tak avanga harsatna awm theite ngaihven fo a tul thu a sawi a. Ram changkang leh hmasawn tawhte tihdan rilru hmanhmawhna nen ngaihtuah chiang hmasa lova kan ti ve zel thin chu a that loh thu sawiin, hmasawnna tluantling awm tur chuan kan khawtlang nunphung leh hnam ziarangte nena inmil zela kal a ngaih thu a sawi a. Social media kaltlanga thudik ziktluaklo hmanga midang beihna hrang hrang thehdarh a ni thin chu veiawm a tih thu tarlangin, ngaihtuahna dik leh rilru hrisel kan put hmasak a pawimawh a ni, a ti a. Zirlaite chu school atanga rilru sukthlek dik leh hrisel zir chhuak ngei thei turin duhsakna a hlan a. An kal leh zelna turah duhsakna hlanin miropui tak tak chher chhuaktu ni zel tura tan la sauh sauh turin a fuih bawk.

Khualzahawm Pu Ramthanmawia chuan engkim hi zirna atanga intan vek a nih thu sawiin, zirna tel lovin mihringin hma a sawn thei lova, khawtlang pawhin hma a sawn thei lo a ni, a ti a, Zirna kawnga tan la sauh sauh turin kalkhawmte leh Bungzung khaw mipuite a fuih a. Govt. Bungzung H/S in Golden Jubilee thleng theia Pathian hruaina a chang chu a lawmpui thu sawiin, hmalam hunah duhsakna a hlan bawk a. Govt. Bungzung H/S hmuna HSLC Exam Centre siam a nih hnu exam hmasa bera zirlai zawng zawngte an pass vek thei chu a lawmpui thu sawiin, School entawntlak ni zel turin duhsakna a hlan bawk.

Govt. Bungzung H/S Golden Jubilee lawmna school tuala hman hi Pu Goldena, Jubilee Committee Chairman-in kaihruaiin, hunserh Upa Lalrithanga, Headmaster, Govt. R.Hranga H/S in a hmanga, School Headmaster Pu R.Rohluma, Jubilee Committee Secretary-in report a pe a. School dintu zinga la damte, HSLC zirlai pass thar leh hemi school atanga Group A Officer chhuakte chawimawina hun hman a ni a. Pu Hualthanga Chhakchhuak, Director, Soil & Water Conservation Department leh Pu T.T Laltanpuia, DEO Champhaite pawhin thu an sawi bawk a. Zai leh lamte nen hun hlimawm tak hman a ni a. Jubilee Committee Member Pu T. Lalawmpuia'n lawmthu sawiin hun a khar a ni.

Govt. Bungzung H/S hi January ni 16, 1970 khan din a ni a. Hripui leng avanga a hun taka jubilee lawm theih loh a nih hnuah vawiin khan ropui takin lawm a ni. Jubilee lawmna pual hian zing dar sawmah Jubilee dar vawi 50 vuak a ni a, Bungzung H/S Golden Jubilee lungphun khuallian Minister Pu T.J. Lalnuntluanga'n a hawng a, Jubilee pual Souvenir a tlangzarh bawk a. MLA Fund hmanga Govt. Bungzung H/S Office Building sak thar chu khualzahawm Pu Ramthanmawia, East Tuipui bialtu MLA, Vice Chairman, Bamboo Link Road Board chuan a hawng bawk.