1918/2022-2023
Champhai, the 14th September, 2022: Mizoram Sawkar Flagship Programme, Socio-Economic Development Policy (SEDP) hnuaia Champhai District chhunga kalpui tur, eizawnna ngelnghet leh hmasawnna siam tura chhungkaw tinzawna duan Family Oriented SEDP chu vawiin chawhma dar 11 khan Law & Judicial, Environment Forest & Climate Change, Transport leh Parliamentary Affairs changtu Minister Pu T.J. Lalnuntluanga, Champhai South bialtu MLA chuan Kahrawt Community Hall, Champhaiah a hawng. He hunah hian Health & Family Welfare Board Vice Chairman Dr. ZR Thiamsanga, Champhai North bialtu MLA leh Bamboo Link Road Board Vice Chairman Pu Ramthanmawia, East Tuipui bialtu MLA te chu Khualzahawm an ni.

Khuallian Pu T.J. Lalnuntluanga chuan ramin hma a sawn theihna tur leh mipui ten hamthatna an neih theihna turin sawrkarin flagship programme SEDP a kalpui thu sawiin, hemiah hian Zoram hmathlir leh hmasawnna rahbi ni tura ruahmanna tam tak chhawpchhuah a ni a, Zofate inpumkhatna leh insuihkhawmnate, ram venhim leh humhalhte, leilung hausakna haichhuah leh hman tangkai te, rorelna dik leh langtlang sawrkar siamte, ei leh bara intodelh tura Mizoram buatsaihte chu a tum bulpui a ni, a ti a. Mipuiten eizawnna ngelnghet an neih theih dan tur sawrkarin a ngaihpawipawh thu a sawi a. Sawrkar tantirhah SEDP atan cheng vaibelchhe 750 dah a nih thu tarlangin, heng sum hi kawng siam nante leh infrastructure dang siam nana hman nghal char char a ni a, mimal leh chhungkuaa bultanna tur atana inpuahchahna kalpui mek laia hrileng vanga harsatna a awm tak thu a tarlang bawk.

Sawrkar hun tawnin a zir loh avanga tum zat ang chiaha SEDP bultan a nih theih loh thu sawiin, SEDP chu huam zau zawka kalpui zel tum a nih thu a sawi a. A bultanna chauh a la ni a, a dang pawh kan la sem chho zel dawn a, mi harsa, puitu nei lo leh chhawmdawl ngaite, leirem la rap lo tan sorkar hian theihtawp a chhuah zel dawn a ni, a ti a. SEDP chu mithiam ten uluk an buaipui a nih thu sawiin, a semtu line department-te chu sem ringawt duh tawk lova, fuihna leh kaihhruaina tha nen a dawngtute vil chhunzawm turin a chah a, a dawngtute hmasawnna report pawh nei turin kan beisei che u a ni, a ti bawk.

Khawtlang nunphung tichhe thei zawnga che thinte laka fimkhur a ngaih thu sawiin, ram ralmuang leh muanawm chhawmnung tura kan tanho angai a ni, a ti a. Sawrkar hnathawkte chu dawrtute tana dawr nuam nih leh hun vawng dik nih tum turin a chah a. Rilru hrisel, dikna leh rinawmna nena hmazawn theuha hna thawh a tul thu pawh sawiin, midangte tana duhsakna leh hmangaihna lantir hi tunlaia kan ram mamawh a ni, a ti a. Hlawhtlinna hmu tlak khawpa hnathawh tam a ngai a, hnam thinlung pu chunga intodelh thei tura tanlak a ngai tawh takzet a ni, a ti a. Kan ram hian tu dang ni lovin a chhunga chengte hmangaihna hi a mamawh a, midanga buai lovin, keimahni zawn theuhah dik taka thawh hi kan ram mamawh ber a ni, a ti a. Family oriented SEDP dawngtute chu zoram leh hnam a lo intodelh nan theihtawp chhuah tur leh rinawm taka thawk tura chahin family oriented SEDP Champhai District chu a hawng a ni.

Champhai District chhunga a enkawl Department hmalaknate tarlangin, Law and Judicial kaltlangin District Court puitling District Judge dah thar a ni a, District Court Building sakna tur pawh central-ah dil a ni a, beiseina sang tak kan nei mek a ni, a ti a. Environment Forest & Climate Change hnuaiah DFO chung Conservator of Forest (Eastern Circle) hawn thar a ni a, thawktute pawh tihfel tawh niin, a building sakna tur sum pawh ruahman fel tawh a ni, a ti a. DTO Building sak thar hna pawh thawh mek a nih thu a tarlang bawk.

Champhai South bialtu MLA ni bawk chuan Horticulture Division puitlinga hlankaite, Seling to Champhai Double Lane, Sorkar hmasain bul a lo tan tawh tuaithara hma lak mek a ni ta te, Zokhawthar Border Trade tihchangtlunna tura cheng vaibelchhe 15 hmanga hmalak a ni te, Melbuk, Zokhawthar leh Dilkawn khuate tana tuilakna peihfel tawh te, Zotlang leh Ruantlang chawmtu tur tuilakna buaipui mek leh Champhai Greater Water Supply Scheme Phase II atana Tankhum lui tuilakna tur DPR tih fel a ni ta te, Keilungliah tuikhuah zawhfel mai turte, Kanan Venga Lei tlahniam siamthat a ni ta te, Sapsakei Lamlian blacktopping-te bakah School engemawzatah Zirtirtu indaihlohna phuhruk turin SEDP sum hmangin Zirtirtu rawih sak an ni te, Champhai Power lakluhna Power Line lian 132 kV line East Lungdar kaltlanga siam a ni ta chu lawmawm a tih thu a sawi bawk.

Health & Family Welfare Board Vice Chairman Dr. ZR Thiamsanga, Champhai North bialtu MLA chuan Covid-19 hrilengin khawvel pum a nghawng thu leh ram ropui tak takte thlenga a tihbuai thu sawiin, hrileng laka dam khawchhuah nan sawrkarin theihtawp a chhuah thin a ni, a ti a. Thawktu leh bungraw mamawh duh khawp ang neih loh kara Sawrkar, NGO leh Kohhrante tanrualna hmanga hrileng do a ni leh tawrhna nasa zawk a thleng lo chu lawmawm a tih thu a sawi a. Tunhnaia Sawrkarin harsatna hrang hrang a paltlang dante a tarlang a, Grape Wine Rule Sawrkarin a siam thar chu lawmawm a tih thu a sawi bawk.

H&FW Department hnuaia hmalakna a tarlan zingah Cancer enkawlna bikah a hemna channel 24 nei Cobalt Therapy, Linear Accelator hman lai bakah JAICA nena thawk hovin vaibelchhe 600 chuang Cancer Speciality Hospital & Research Centre Zemabawkah siam tum a nih thu a sawi a. Hospital hrang hrangte sakthat leh cheithat zel tum a nih thute, Oxygen mamawh angte hnianghnar taka pek a nih thute a sawi a. Sub-Centre zawng zawngte Health & Wellness Centre-ah hlankai deuh vek tawh niin, Sub-Centre awm lohnaah Health Clinic hawn vek tum a ni, a ti bawk.

Thusawitu dang Bamboo Link Road Board Vice Chairman Pu Ramthanmawia, East Tuipui bialtu MLA chuan hrileng vangin kum 2 chhung hmasawnna leh Sawrkar flagship program lam hawi thei lova hun engemawchen a khaihlak hnuah leh harsatna tawh mek kara family oriented SEDP kalpui a ni thei ta chu lawmawm a tih thu a sawi a. Sawrkar kum tharah beneficiary dangte pawh thlanga hmalakna zau zawk neih tum a ni, a ti a. A then tana bultanna leh hma la tawhte tana chhunzawmna tur a nih thu sawiin, hamthatna dawngtute theihtawp chhuah turin a chah a. Harsatna hrang hrang Sawrkarin a lo paltlang tawh dante tarlangin, hun tha leh duhawm tak hnuaiah hmasawnna hna chak taka thawh a nih leh ngei a beisei thu a sawi bawk.

Tunhnaia siam Land Revenue Amendment Bill 2022 chungchang tarlangin, he dan hnuaiah hian LSC leh pass pawh awm mumal lohna thingtlangah LSC anga hman theih tur Property Card siam a ni dawn a, inhmun lo ram hlutna a tisang ang a, neitu nihna tichiangtu tur bakah loan lak dahkham atan thlenga hman theih a ni tawh tur chu thingtlanga chengte tana nghahhlelhawm tak a ni, a ti a. Sawrkar ram hawhtuten thlai chauh nilo leilung hlutna zangnadawmna za zela 85 thlenga an dawng thei tawh tur chu lawmawm a tih thu a sawi bawk.

He hun hi District Bawrhsap Pu James Lalrinchhana, Chairman, District Level SEDP Committee chuan kaihruaiin kalkhawmte lawmna thu a sawi a. Pu B.Lalchhawntluanga, Member Secretary & Project Director, DRDA Champhai hnen atangin SEDP kalphung, inkaihhruaina leh dinhmun tlangpuite ngaihthlak a ni a. Family Oriented SEDP hnuaia hamthatna dawng tura thlan chhuahte aiawhin line department hrang hrang atanga mi 15 te hnenah SEDP tanpuina sem chhuah a ni a, tanpuina hi Direct Benefit Transfer hmangin bank account-ah thun a ni dawn a. Pi Esther Leihang, SDC in lawmthu sawiin hun a khar a ni.

Champhai District chhunga Assembly Constituency 3; 23-Champhai North, 24-Champhai South leh 24-East Tuipui huamchhung khua 68 ah Line Department 8 kaltlangin hmalak a ni dawn a. Animal Husbandry & Veterinary hnuaiah hamthatna dawngtu tam berin beneficiary 2277 an awm a, adangte chu Commerce & Industries hnuaiah 730, Agriculture hnuaiah 843, UD&PA hnuaiah 42, Horticulture hnuaiah 304, Sericulture hnuaiah 19, Fisheries hnuaiah 280 leh Land Resources & Soil hnuaiah 5 te thlan an ni a. Assembly Constituency pakhat atangin SEDP dawng tur chhungkua 1500 zel thlan niin, beneficiary 4500 an awm dawn a ni.