119/2022-2023

Champhai, the 11th April, 2022: Vawiin chawhma dar 10 khan Champhai District Drugs Disposal Committee buatsaihin Champhai  District Police ten ni 24.05.2019 atanga 15.10.2021 chhunga ruihhlo an man, case kal lai mek (Pre-trial) heroin No. 4 hawng 78 (gram 1035), tualchhung rate-a Rs 37,90,000 (Nuai sawmthum pasarih leh singkua), International market rate-a chhuta Rs 4,87,50,000 (Cheng vaibelchhe li, nuai sawmriat pasarih leh singnga) man leh trial zawh tawh, Court atanga tihral phalna order awm sa (Post Trial) engemawzah chu Law & Judicial Minister Pu T.J. Lalnuntluanga chuan District Hospital Champhaia bawlhhlawh halralna Incinerator-ah mei depkaiin a halral.

Pu T.J. Lalnuntluanga chuan sual dona kawnga hmalakna leh mipuite hnena inzirtirna pawimawh tak ruihhlo mante halralna hun  buatsaih a ni chu lawmawm a tih thu sawiin, ram leh hnam himna tura thahnemngai taka thawktu Police, Excise leh anmahni tawiawmtute chhuanawm a tih thu a sawi a. Kan ram zimte leh mi cheng tlemte awmna hian harsatna midang tawh ang kan tawk ve tho a, hmasawnna leh mithiam tak takte pawh neih belh zelin khawchhak kil thleng pawha kan neih chho mek zel karah thil lawmawm lo ruihhloin min run chho mek zel a ni, a ti a.  Ruihhlo chuan chhungkua a luhchilh thuk deuh deuh a, pawisawilo nunna suatin nunau rumna a thlen thin a, chhungkaw economy tichhiain ram economy thlengin a nghawng thin a ni, a ti bawk.

Law & Judicial Minister chuan ruihhlo avanga ram tluchhia leh hnam ral an awm tawh thin thu sawiin, hnam dam nan leh dinchhuah nan ram leh hnam hmangaihna rilru pu chunga beihpui thlaka do let a ngaih thu a sawi a. Mithiam thil hria ataka hnathawk duh mi, mahni, chhungkua leh ram tana inpe tak tak kan mamawh thu sawiin, piantharna leh ram leh hnam hmangaihna thinlung tak tak nena kan tan tlan loh chuan ruihhlo do kawngah hlawhtlinna tluantling kan hmu lo ang tih ka hlau thin a ni, a ti a. Hnam rallohna turin sakhuana leh hnam neitu nihna leh hmangaihna kan kal kawptir thiam a tul tawh takzet a ni, a ti bawk.

Hlawhtling taka ruihhlo leh a kaihhnawihte do a nih theih nan mahni theuh kan pawimawh thu leh thangtharte hnenah zirtirna nasa zawk kan tuh a ngaih thu sawiin, ngaihtuahna leh rilru puthmang hrisel nitina kan put phawt chuan thil thalo, ram hmelma tih duhna rilru kan pu hman dawn lo a ni, a ti a. Kalkhawmte chu ruihhlo leh a kaihhnawih hrang hrangte do kawngah tha thlah lova tanrualpuiah sawmin theihtawp chhuah zel turin a chah a ni.

District Bawrhsap Pu James Lalrinchhana chuan tunhnaiah ruihhlo tawlh leh man a zing malh malh hle thu sawiin, tha thlah lova theihtawp chhuaha man thintu Police, Excise leh anmahni tawiawmtute fakawm tiin, an tha tichak tura theihtawp chhuah zel a nih tur thu a sawi a. Bengsika inngaihtuah chungin Sikul, Kohhran leh khawtlang huapin damdawi leh ruihhlo laka fihlim thei tur leh a nghawngte inzirtirna zau zawk neih a tul takzet thu a sawi bawk a. Official, NGO, Media leh mipuite tanhona hmangin District-in hma a sawn ngei ang tih a rin thu sawiin, Official-te chu hotute thu tha hrilh ngam leh an tha tichaka fuih ngamtu nih tum turin a chah a. Khawtlang tana malsawmna nih tum tur leh mahni hnate Pathian rawngbawlna a ni tih hriaa theihtawp chhuah nachang hre reng thin turin a chah a ni.

He hun kaihruaitu Champhai SP Pu Lalrinpuia Varte chuan tunhnai chhoah ruihhlo man a tam zual thu sawiin, United Nations Office on Drugs & Crime (UNODC) report tarlan danin thenawm ram Myanmar buai denchhenin dan lova ruihhlo siam chhuahna hmunpui Golden Triangle-ah ruihhlo siamchhuah a tam a, supply a lo tam chuan a man pawh a lo hniam a, chuvang chuan international drug trafficking route a lo awm Mizoramah pawh man tur a lo tam phah niin a lang, a ti a. Ruihho tawlh ven mai bakah, ruihhlo ngawlveina leh a nghawng thalo dangte ven tel kawngah tan kan lak deuh deuh a tul a ni, a ti a. Champhai District Police ten January 2021 atanga April ni 11, 2022 vawiin ni thlengin Heroin no 4 gram 8,448 leh Methamphetamine mum 1,36,100 an man thu a sawi a. May ni 24, 2019 atanga October ni 15, 2021 chhunga Champhai District Police-te man Pre-trial Pseudoephedrine kg 240 leh Methamphetamine kg 31.81 chu High Level Drug Disposal Committee chuan kumin March ni 25 khan Aizawl-ah an lo halral tawh thu a tarlang bawk.

Thusawitu dang Sub-Hqrs. YMA Champhai President Pu F.Lalrinmuana chuan theihtawp chhuah a ni chunga ruihhlo man tur heti zat a awm leh a kalkawng atana ramri dep District-te hman a ni thin chu vanduaithlak a tih thu sawiin, midangte nunna suattu leh harsatna thlentu ruihhlo hmanga sumdawng leh eizawng thinten bansan se tih chu YMA duhdan a nih thu a sawi a. Ram hmelma leh tichhetu theihtawp chhuaha a do kawngah leh thangtharte nun chhanhim kawngah kan zavaia tanrual a ngai a ni, a ti bawk.

Champhai District Police-te hmalaknain ruihhlo dona kawngah beihpui thlak mek zel niin,  ruihhlo tawlhtu, zuarchhawngtu leh hmangtute manchhuah mek zel an ni a. Khawtlang leh ram a lo thianghlim zel theih nan ruihhlo dona kawngah mipuite tawiawmna an ngen a ni.