No.6938/2020-2021

Vawiin chawhma khan Champhai District Drugs Disposal Committee buatsaihin Champhai District Police te'n ruihhlo an man case kal lai mek (Pre-trial) Heroin gram 877, Rs. 17,52,000/-  man leh  Methamphetamine gram 960,  Rs. 4,50,000/-man, avaia hlut zawng belhkhawm Rs. 22,02,000/- te,  trial zawh tawh District Court atanga tihral phalna order awm sa (Post Trial) Heroin gram 3155.3 leh Ganja kg 72.6, avaia hlut zawng belhkhawm Rs. 1,70,72,300/- te, Drugs & Cosmetics Act hnuaia man khuh damdawi KOF-T bur 83 leh KOFF-RUM bur 17  bakah Sava vehna  Airgun 3  District Magistrate-in a mante halralna hun District Hospital Complex  Champhaiah neih a ni a. He hun hi Pu T.J. Lalnuntluanga, Law & Judicial Minister chuan khuallian ni a hmanpuiin, heng ruihhlo leh Silai mante hi District Hospital Champhai Incinerator-ah a halral a ni.

He hun hmanpuitu khuallian Pu T.J. Lalnuntluanga chuan ram dang leh hnam dangin ruihhlo hmanga min run hi tharum thawhna hmanga do let lovin hnam hmangaihna thinlung pu chungin do tlang ila, hemi tur hian kan thinlungah ram leh hnam hmangaihna dik tak tuh thar leh a tul tak  meuh a ni, a ti.  Sawrkarin ruihhlo ngaite enkawlna tha pek a ngaihpawimawh thu tarlangin, enkawlna hmunte chu thiam thil zirna leh nun kaihruai thei zawnga buatsaih thiam a tul tak zet a ni, a ti bawk. Chhungkaw tam taka buaina thlentu, khawtlang leh rama innghirnghona leh raltitna thlentu ruihhlo do kawnga theihtawp chhuah a ni chu lawmawm a tih thu sawiin, mahni tanghma hai hauh lo leh hrehawm pawisa lova beitute chu fakawm a ti a. Ruihhlo beihletna chu theihtawp chhuaha thlawp tlat a tum thu sawiin, khawtlang mipuite chu mahni phak tawk theuha  penchhuaka  thawhhopuiah a sawm nghal a ni.

Thusawitu dang Bawrhsap Pi Maria C.T Zuali chuan  thalai tam tak suattu ruihhlo man anih theihna kawnga theihtawp chhuah thintu Police-te leh YMA te chu fakawm a tih thu leh tha thlah lova tang mar chhunzawm zel turin a fuih a. Ruihhlo laka fihlim tura sawrkar hmalakna Nasha Mukht Bharat kaltlanga zirtirna zau zawk kalpui tum anih thu leh damdawi nghei theihna tura Satellite Opioids Substance Therapy kaltlanga hmalak anih thu a tarlang bawk a. Bawrhsap chuan ramngaw leh nungcha humhalh a tul thu pawh sawilangin   khaw kar kawngah amah ngei pawhin sava vehna  Silai 3 a man tawh thu leh   halral tur zingah telh anih thu a sawi a ni.

He hun kaihruaitu Champhai SP Pu Rex Zarzoliana Vanchhawng chuan  ruihhlo do beihpui Anti Drug Drive denchhena ruihhlo hal buatsaih anih thu a sawi a. Law & Judicial Minister-in a telpui thei chu lawmawm tiin, hei hian ruihhlo do kawngah mipuite   zirtirna zau zawk a pe thei dawn a, ruihhlo dona kawnga lungrual taka hmalakna chuan mipuiah leh a la ti ve loteah zirtirna tha tak a pe dawn a ni, a ti. Damdawi mante rei tak dah a him loh avangin sawrkarin case chinfel lohte pawh tihral pre trial disposal a phal thin thu sawiin, man tawhte chhekkhawl lova rei rial lovin thla 3-4 danah   halral zel tum a ni, a ti bawk. Anti Drug Drive kaltlangin ruihhlo ti thinte enkawl nana hmalak, a vawrh thinte dap leh hlawm liana vawrh thinte bitum zel tum anih thu a sawi a. Ruihhlo do kawngah chak lehzuala hma lak thar an tum thu sawiin, dan leh thupek kenkawh mai bakah ruihhlo do kawngah theihtawp chhuah an tum thu leh ruihhlo chu a kalna tur lam thlir lova an vai hma zel dawn thu a sawi bawk.  

Ruihhlo halna hun hi Champhai Police-ten Anti Drug Drive, December Ni 15-22, 2020 chhunga an hmalakna kal zel behchhana ruahman a ni a. He beihpui an thlak chhung hian, drugs tawlhtu, zuarchhawngtu leh hmangtute manchhuah beihpui an nei mek bawk. Champhai Police-te chuan hemi hun chhung piah lamah hian Krismas leh Kumthar lo awm turah pawh tha thlah lovin ruihhlo do beihpui neih chhunzawm zel an tum bawk a ni.