901/2023-2024

Khawzawl, the 23rd June, 2023: Vawiin khan Law & Judicial Minister Pu T.J. Lalnuntluanga chuan District Court Khawzawl sakna tur, thawktute chenna hmun tur Residential Area leh District Jail sakna tur hmun ruahmante a enfiah a, hemi hnu hian 2nd I.R. Bn. Hqrs. Khawzawl a tlawh bawk.

District Court hmun atana ruahman Martar Thlan hnuai leh Judicial Officer leh Staff-te chenna tur Residential Area atana tih Bangla Mualte bakah District Jail hmun tura ruahman Keikhumte a enfiah a. District Court, Residential Area leh Jail-te a ranglama sak thuai a nih theih nan mithiamte'n a tul angte bawhzuiin an enfiah nghal a. Court hmun tura ram ruahman hi karleh Thawhtanni atangin Darngawn VC te'n an samfai ang a, July thla tir lamah a hmunhma hi tehfel a ni ang.

Chawhnu lamah Law & Judicial Minister hian 2nd I.R Bn. Hqrs. Khawzawl tlawhin Pu Saidingliana, MPS, Commandant leh hotu pawimawh dangte'n an lo dawngsawng a. Headquarters hmalakna tlangpui leh tul dangte Minister hnenah hian an lo thlen a ni.

Law & Judicial Minister Pu T.J. Lalnuntluanga chuan IR Police-te chu nunau leh mipuite thlamuantu leh venghimtu, mipuite him nana pawimawh tak an nih thu a sawi a. Sawrkar chuan Police hlutna leh pawimawhna hriain a thuam chak zelna atan theihtawp a chhuah a. Chutih mek laiin, khawvel pum min tibuaitu hripui vangin duh angin hma a lak chak theih lova, a tul anga thuam chak zel turin ruahmanna a nei mek a ni, a ti bawk.

Law & Judicial Minister hi Pi Sylvie Zomuanpuii Ralte, MJS, Addl. District & Sessions Judge, Champhai Judicial District, Pu Lalfakzuala Addl. DC Khawzawl, Pu Lalchhuanthanga SP Khawzawl, Pu Thomas Lalrammawia, MJS, Deputy Secretary, Law& Judicial Department, Pi Zonunpari, Architect, PWD leh mi pawimawh dangte'n an tawiawm a ni.