4022/2022-2023

Champhai, the 29th March, 2023: Formosa Foundation India bultuma ruahman, Oxygen Concentrator-te chu vawiin chawhma dar 11:00 khan Sub-Hqrs. YMA (SYMA) Champhai Office, Tlangrawtah Law & Judicial Minister Pu T.J. Lalnuntluanga chuan Champhai khawpui leh a chhehvela YMA Branch 21 leh SYMA Champhai kutah a hlan.

Pu T.J. Lalnuntluanga chuan thlei bik nei lova mipui tana rawngbawltu leh tanpui ngaite tanpuina kawnga hmahruaitu YMA kaltlanga hmalaknate a ngaih pawimawh thu leh, Champhai mamawh leh tul angte dapa theihtawp chhuah a nih thu sawiin, damlo phurtu Ambulance leh hnukchhuak motor Recovery Van te pawh Sub-Hqrs. YMA kutah hlana hman hawh tir a lo nih tawh thu a sawi a. Oxygen Concentrator mamawhna a san avangin hemi kawnga hmalak a nih theih nan Formosa Foundation India-te dawra hmalak a nih thu tarlangin, hemi bawhzuina kalzela Oxygen Concentrator engemawzah ruahman a ni ta chu lawmawm a tih thu a sawi a; mipuite rawngbawl sak kawnga Formosa Foundation India Chairman Pu Jonathan Lalremruata leh a thawhpuite thahnemngaihna leh inpekna chu fakawm a tih thu a sawi bawk.

Law & Judicial Minister chuan mipui pung zel leh veng len dan azirin Oxygen Concentrator mamawhna a inchen vek loh thu leh mamawhna a san zel thu pawh sawiin, a tul huna hman mai theih tura Branch YMA te kuta Oxygen Concentrator hlan fel a ni thei chu lawmawm a ti a. YMA member-te chu zonun zemawi chawinunga, midangte puih duhna thinlung tak tak nei chhunzawm zel turin a chah nghal bawk.

Oxygen Concentrator inhlanna hun tawi buatsaih hi Pu T.Lalnunsanga, Vice President, Sub-Hqrs. YMA (SYMA) Champhai chuan kaihruaiin, Law & Judicial Minister hmalakna kaltlanga Ambulance, Recovery Van leh Oxygen Concentrator-te ngaihtuah a nih avangin YMA hmingin lawmthu a sawi a. Pu Lalzahawma Varte, Asst. Secretary-in report a pe bawk.

Hemi hma hian Formasa Foundation India kaltlang hian Mobile Ventilator chu District Hospital Champhai hnenah Law & Judicial Minister hian a lo hlan tawh bawk a. Heng bakah hian Urban PHC Champhai Vengthar kutah nimin khan Formosa Foundation India kaltlanga dawn Oxygen Concentrator a hlan bawk.