No.7486/2020-2021

Mizoram Journalist Association (MJA) Champhai District chuan vawiin khan Annual Conference vawi 33-na Press Club, Bethel Veng, Champhaiah an hmang a. He hun hi Pu T.J. Lalnuntluanga, Law & Judicial Minister chuan khuallian niin a hmanpui a ni.

Khuallian Pu T.J. Lalnuntluanga chuan Chanchinbumite chu mipui sukthlek a tha zawnga her danglama kaihruai thei tura zirtirtu pawimawh tak an nih thu sawiin, an thuchhuah turte finfiah hram hram thin tur leh an thudawnnate tarlang thin turin a chah a. Sawrkar rorelna leh Champhai hmasawnna siam leh puanzar kawngah MJA in a laia lung pawimawh tak a chan thu sawiin, mamawh an neih leh puih an ngaihna zawnah hmalakpuia enzui pui a tum thu a hrilh a. MJA Member-te chu mipuite zirtirna leh insiamthatna lamte tarlang hnem tura tan la lehzual tur leh mahni ngei penchhuaka thu dik leh ziktluakte mipui hnena chhawpchhuahsak tum turin a fuih a. Mipuite rawn leh thudik hriatna hnar pawimawh tak an nih angin an tawn hriatte chhawr tangkaia rawn tlak ni tura inzirthara tanla zel turin a chah a ni.

Forest Minister ni bawk Pu T.J. Lalnuntluanga chuan Champhai District-a ram ngaw chereu chak tak dolet nan NEC-ah Afforestation of denuded hills in Champhai District tih project thehluh anih thu leh pawm a nih thu a sawi a. Thing lian leh thang duh turte tihpuna phun tam tum anih thu sawiin, phun tam viau a enkawl that leh loh aiin mamawh leh enkawl zawh tawk phuna enkawl puitlin tum ani, a ti. Champhai khawpui thanzelna tur ngaihtuah chungin khawpui felfai zawk din turin Champhai Master Plan duan mek a nih thu leh kum 2031 thlir chungin survey data-te lak zawh tawh niin preliminary survey pawh zawhfel tawh a ni, a ti a. Champhai Master Plan duan chhin report tlangpui tarlangin, hripui leng vanga intodelh pawimawh zia lo langte chuan Leilet Phaizawl humhalh a tul zia a entir ani, a ti a. March 2021 ah Champhai Master Plan peihfel tum a ni, a ti bawk.

He hun hmanpuitu Pi Maria C.T. Zuali, Deputy Commissioner Champhai pawhin thu sawiin, sawrkar hmalaknate, mipuite hnena hriattur puan leh scheme pawimawh tak takte puanzar kawngah MJA Member te'n sawrkar an tawiawm tlat thin chu lawmawm a tih thu a sawi a. Lungrual taka an thawhhona chu fakin, an thlawpna tel lovin sawrkar a khingbai thu leh tun mai nilo nakin zel thlenga tha taka thawhho a beisei thu a sawi bawk.

MJA Champhai District President Pu Lalhmingmawia Pachuau chuan sawrkarin MJA te a ngaihsak thinna leh Khuallian Law & Judicial Minister ngei pawhin a duhsak thinna avangtein pawl aiawhin lawmthu a sawi a. Chanchinbumite chu tunlai thuthang diklo vawrh darh tam lutuk karah mipuite hriattur thudik  hrilhfiah kawnga tanla lehzual turin a fuih a. Mawhphurhna sang tak nei an nih inhre thar leha an hlutna vawng nung tura taimak chhuah turin a sawm a ni.

Vawiin MJA Champhai District Annual Conference Law & Judicial Minister Pu T.J. Lalnuntluanga hova hmanna hun hi Pu Lalhlupuia, Vice President, MJA Champhai District-in a kaihruai a. MJA Champhai District-te'n an  thlan Miss India Mizoram Nl. Lalmuansangi Varte hnenah MJA Champhai District buatsaih chawimawina thuziak chu Khuallianin a hlan a. Pu C.Lalrinsanga, General Secretary-in lawmthu sawina hun hmangin hun a khar a ni.

Chawhma lamah an pawl President  Pu Lalhmingmawia Pachuau  kaihhruaina hnuaiah rorel inkhawm neih a ni a. Pu Z.D Dengliana, Fin. Secretary-in hunserh a hmang a. Pu C.Lalrinsanga, Gen. Secretary leh Pu Lalhmingliana, Treasurer te'n report an pe a ni.

MJA Champhai District Annual Conference vawi 33-na hi Pu Rex Zarzoliana Vanchhawng SP Champhai, Pu R.Lalnghakliana PD, DRDA Champhai leh Dr. Lallawmkima DIPRO Champhai te'n an telpui bawk a ni.

MJA Champhai District hi December Ni 31, 1988 khan  Champhai Journalist Association (CHJA) ti a din a ni a. February Ni 11, 2006 khan MJA Champhai District ti a thlak a ni. A dintute zinga 3 te'n  tun thlengin an la telpui thei a ni. Tun dinhmunah hian Member 15 an awm meka, heng zinga 12 hi Champhaia awm niin Khawzawlah mi 3 an awm a, Champhai District-ah hian Daily Newspaper 3 leh Local Cable TV  2  a awm mek a ni.