No.1266/2021-2022 

Dated Champhai, the 5th July, 2021: Law & Judicial Minister Pu T.J. Lalnuntluanga, Champhai South bialtu MLA ni bawk chuan vawiin khan a bial chhunga Covid-19 hripui do kawnga Indo-Myanmar ramri venga rammu VLTF duty post hrang hrang  Melbukah hmun 2, Zokhawtharah 4, Ruantlangah 2 leh Tlangsamah 2, a vaiin duty post 10 te a hmunah kalchilhin a tlawh. HSLC & HSSLC (2020-2021) exam-a hlawhtlinna changte lawmpuina thilpek pawh khawtlang hruaitute kaltlanga hlan chhunzawmin vawiin khan a zo fel a ni.

Minister Pu T.J. Lalnuntluanga chuan kum hmasa lama tih tawh thin anga HSLC leh HSSLC pass tharte lawmpui tura bial fang a nih mai bakah hrileng do kawnga thahnemngai taka thawktu VLTF  hmalaknate leh Vawk pul hri African Swine Fever khuahkhirh a nih theihna tur kawnga thawhlawm thawh tura bial fangkual a nih thu a sawi a. Covid-19 hri leng laka kan him tlan theihna tura VLTF ramri duty-te thawhrimna hriatpui leh hmuhpui tura an duty hmun ngeia kalchilha tlawh a nih thu hrilhin, hripui vangin khawvel pum a buai a, ram changkang zawkte thlengin nasa takin a nghawng a ni, a ti a. Ram sum leh pai dinhmun enin hripui hmachhawn huphurhawm viau mahse tanrualna tha tak  avanga tun dinhmun thleng thei kan ni hi a fakawm takzet a ni, a ti a. Ramri kaltlanga hri kaidarh thei tur vengtu VLTF duty-te chu theihtawp chhuaha thawk zel turin a chah a ni.

Law & Judicial Minister chuan ram changkang leh upa zawkte nena inkhaikhin chang awm thin mahse hmabak tam tak kan la nei a, kum sangbi chuang lo inkaihhruaia inrelbawl tawh ram hmasawnte chu zirna, thiamhnangdeh, sumdawnna, infiamna leh thil dangahte tluk pha thei turin theihtawp kan chhuah a ngai a ni, a ti a. Tunlai nunah hnam anga ei leh bar dehchhuah kawnga intodelh kan mamawh thu leh, zir thiamna chu mimal, chhungkua, khawtlang leh ram thlenga intodelh dinhmuna min hlangkai theitu a nih thu sawiin, khawtlang hruaitute chu an thusawi theihna hmun apiangah zirna lam hawi uar zawka sawi thin turin a chah a ni.

Vawiina zirlai hlawhtlinna chang lawmpuina thilpek hlante hi Melbukah 14 leh Zokhawtharah 55, an vaiin mi 69 te hnenah lawmpuina lehkhabu Dictionary khawtlang hruaitute kaltlanga hlan niin, VLTF leh ramri duty-te hnenah tanpuina Pawisafai, Silpaulin, Hand sanitizer, Odomos, Solar lights, Thosilen leh leh Face mask, chawhmeh bakah, Vawk pul hri laka invenna Sodium hypochlorite leh Chinai-te hlan an ni a. Zokhawthar VLTF tanpuinan buhfai bag 20, Alu bag 10, Tel  case 10, Nutrella bag 6, Dal bag 3 leh mamawh dangte a hlan bawk.

Pu T.J. Lalnuntluanga hi Champhai atangin  Pu Lalrinpuia Varte SP, Pu R.Lalnghakliana PD DRDA, Pu Lalnunfela Chawngthu SDO Sadar, Pu Lalduhthlana DFO, Pu Vanlalchhuanliana BDO, Dr. Lallawmkima DIRPO, Pu H.Vanlalthanga, OC Champhai P.S, Sub-Hqrs. YMA hruaitute leh khawtlang hruaituten an tawiawm a ni.