No.1259/2021-2022

Dated Champhai, the 5th July, 2021: Law & Judicial Minister Pu T.J. Lalnuntluanga, Champhai South bialtu MLA ni bawk chuan a bial chhung veng leh khaw hrang hrangte fangkual zelin, vawiin khan HSLC & HSSLC (2020-2021) exam-a hlawhtlinna changte lawmpuina thilpek khawtlang hruaitute kaltlangin a hlan chhunzawm.

Pu T.J. Lalnuntluanga chuan a bial chhunga zirlai hlawhtlinna changte thinlung taka a lawmpui rualin hlawhtlinna chang lote pawh indawm kun mai lova hlawhtling tuma theihtawp chhuah zawk turin a chah a. Zirna leh thiamna tamna hmunah ram a ralmuangin remna a awm a, tih tur leh tih loh turte tha taka zawm thin a ni, Law Minister chuan a ti a. Zirna kawngah thanharh a ngaih thu leh khawtlangah inzirtirna neih tam a tul thu sawiin, veng chhungah lehkhathiam tam zawk chherchhuak thei tura infuihthar kawnga tan la zel turin khawtlang hruaitute a chah a ni.

Zirlaite hmakhua leh kalzelna tur thlir chungin hmalakna tur lam hawia ngaihtuahna sen a nih thu leh, hripui leng vanga career guidance huapzau zawk neih tuma ruahmanna awm khaihlak rih chu hun remchangah ngaihtuahna thar nen kalpui tum a ni, a ti a. Tihtur hriat mai bakah tih loh turte hriat hran a tul a, Sawrkar hnathawh mai bakah, eizawnna tlak hna dangte thiam nal thei tura inzirtirna neih a tul hle a ni, a ti bawk.

Minister chuan Covid-19 hri leng do kawnga ram leh hnam tana Village Level Task Force-te thahnemngaihna fakawm tiin, theihtawp chhuah chhunzawm zel tur leh, khawtlang mipuite chu Vawk pul hri African Swine Fever inkaidarh tur khuahkhirh a nih theihna tura inthlahdah lova fimkhur zel turin a fuih a. A bial chhungah hripui leng kara inkhuahkhirhna kalpui vanga chhuanchham an awm lohna tura tanrual a tul thu sawiin, harsatna nei an awm chuan a hnena thlen hreh lo turin khawtlang hruaitute a chah a ni.

Vawiina zirlai hlawhtlinna chang lawmpuina thilpek hlante hi Tlangsamah 30, Zotlangah 62, Mualvengah 12, Ruantlangah 36, Mualkawiah 22, Kelkangah 18 leh Dilkawnah 24, an vaiin mi 204 te hnenah lawmpuina lehkhabu Dictionary khawtlang hruaitute kaltlanga hlan niin, VLTF-te hnenah Hand sanitizer, Face mask bakah, Vawk pul hri laka invenna Sodium hypochlorite leh Chinai-te hlan an ni a. Zotlang leh Ruantlang khawtlang hruaitute hnenah Oxygen concentrator a hlan bawk.

Pu T.J. Lalnuntluanga hi Pu Lalrinpuia Varte SP, Pu Lalnunfela Chawngthu SDO Sadar, Dr. Lallawmkima DIRPO leh Pu H.Vanlalthanga, OC Champhai P.S ten an tawiawm a ni.