Lawngtlai, Tomir thla ni 27, 2020: Law & Judicial leh Transport, etc. Minister Pu TJ Lalnuntluanga chuan vawiin khan Lawngtlai a tlawh.

Minister hian chawhnu dar 2-ah Lawngtlai thlengin, Bawrhsap Pi Shashanka Ala, IAS nen a office chamber-ah an inkawm a. COVID-19 kaihhnawiha Lawngtlai District chhunga hma lakna hrang hrang an sawi dun a. Bawrhsap hian District mamawh thenkhat a hnenah hian a lo thlen a ni.

Hemi hnu hian Lawngtlai District Court tlawhin, Chief Judicial Magistrate (CJM) Pu BT Lala Sakachep leh a thawhpuite'n District Court tihchangtlun nana thawktu, bungrua leh thil dang mamawh an neih hrang hrang te an lo thlen a. Law & Judicial Minister chuan a hnena an thil thlente chu a theih anga lo bawhzui a tum thu sawiin, District Court atana DC office building an luah mek leh Court building thar sakna tura ruahman hmunhma te an en ho bawk.

Minister hian Lawngtlaia District Transport Officer (DTO) office sak thar chu tlawh bawkin, a chhung a fang kual nghal a. DTO Pu V. Lalruatliana leh a thawhpuite'n an lo dawngsawng a ni.

DTO office building hi PWD Building Division te sak niin, a chhung electric fit tih loh chu an zo fel tawh a. Minister chuan remchang hmasa berah luah luh theih tura hawn thuai tum a nih thu a sawi. Lirthei BS-IV (Bharat Stage-IV) register chungchangah Supreme Court-in kumin March thla tawp thleng hun a hawn hnuah April thla tawp thleng a pawt sei leh a, State Transport Department pawhin kim taka register a nih theih nan hma an la nasa hle tih sawiin, chuti chunga la register hman loh awmte chu Supreme Court leh Ministry of Road Transport and Highways thu a nih tawh avangin state sawrkarin thu a neih tawh loh thu a sawi.

Minister hian vawiin tlai khan Lawngtlai chhuahsanin Tuipang a pan a, COVID-19 do nana ramria hma lak dan te a hmunah enin, ramria duty-te a tlawh ang.