Vawiin chawhma khan Law & Judicial Minister Pu Lalsawta chuan ATI Auditorium ah Court cases kaihhnawih bika sawrkar file khawihtu -Nodal officer Superintendent leh Assitant te tana Law & Judicial Department leh Administrative Training Institute(ATI) tangkawp in training a buatsaih a hawng.

Training hawngtu, Law Minister Pu Lalsawta chuan sawrkar hnathawk te chu insawn kual thin an nih angin an thawhna thar ah an hnathar te tha taka an thawh theihnan an intahhriam reng a ngai tih sawiin sawrkar tana court cases khawihtu official te phei chu an inzir nasat zual bik a ngai a ti. Department hotute pawh court case kaihhnawih lehkha an hmuh ruala Court Case File khawihtu Assistant te hnena hmahmawh taka pek nghal nachang hre turin a chah a. Finance Department enkawltu ni bawk Pu Lalsawta, Law Minister chuan Mizoram sawrkara sum chhunluh awm chhun te Compensation sumah leh court case-a sawrkar a chakloh avanga pek chhuah a ngai thin chu a rilru nat thlak takzet a ni a ti a. Court case-a sawrkar a chak theihnan court hniam zawk, case ngaihtuahna hmasaah sawrkar Ukil te theihtawpa puih an ngai a ni a ti a. Dealing assistant leh Dealing official ten lehkha pawimawh kimchang tak, a bo a bang awmlo leh file kalphung kimchang taka kalpui chunga sawrkar ukil te an tawiawm phawt chuan sawrkar tan chaklohna tur chhan leh vang a tam lo hle a ni a ti. Court hniam zawka lehkha thehluh bak lehkha dang court sang zawkah thehluh a theih tawh loh tih sawiiin Court hniam zawka chetchhiat tawh chuan court Sangber Supreme Court ah pawh dinhmun tha neih a harsat thu a sawi a. Dealing official te chu Court case kaihhnawih ah tan la thar leh tur leh fimkhura sawrkar tan thahnem ngai turin a chah. Law Minister Pu Lalsawta chuan," District Council hnuaia dan siamah khan Village Council ten dawr leh huan leh thildang atan ni lo, 'In Hmun' atan chiah ram an pe thei a; chuvangin, Land Compensation ah VC te pass pek hi a nung lova, a nunglo te a nung anga cheibawla Deputy Commissioner Office a thawkten an va tlawha, assesment an va siam avanga Court in thutlinga a lo pawm thin hian sawrkar in kan chawi tawk tawk zel a, a pawi hle a ni", a ti a. Land Compensation chungchangah sawrkar tan vengtu ni turin traning chhimtute chu a chahin VC pass tanchhana huan leh ram hmachhuana compensation rawn phutna lehkha te a awm a nih chuan chung file chu process loh mai tur a ti a. Law Minister Pu Lalsawta chuan Minister leh MLA te chu sawrkarna neitu, mipui ten an aiawh tura an thlan an nih ang in an tana hna pawimawh ber chu ram hmasawnna atan leh mipui hamthatna tura 'Dan siam' a nih thu a sawi a. Mizoram sawrkar in hma a lo sawn nasat zawk nan dan tha zawk leh tangkai siamchhuahna kawngah sawrkar hnathawkte chuan Minister leh MLA te thurawn pek nachang an hriat a ngai ti in Legislator te chu thurawn thazawk dawngsawng turin an inhawng reng a ni a ti.

Court Case kaihhnawiha training buatsaih hawnna hi Pu Zahmingthanga Ralte, Joint Secretary, L& J in a kaihruai a; Pi Marli Vankung, Secretary, L&J in training huaihawt a nih chhan te a sawi hnuah training session 5-a then hi tan a ni a. Training chhimtute hian Disciplinary proceedings vis-a-viz court cases, Action on report of inquiry Officer and Penalties in disciplinary Proceeding, Basic step & strategy to be adopted in dealing with Notices/Court cases at the level of sub-ordinate courts, High Courts & SC Level, Basics on legislative drafting (policy ordinance, Rules, Acts) and drafting of MOUs agreements on behalf of the Government leh General role and responsibility of Nodal officers, Superintendents, Dealing assistants i/c Court Cases chungchang te mithiam te hnen atangin an zir a ni.