682/2022-2023
Vawiin khan Haulawng khua,Lunglei District-ah Lawhleng Weekly Newspaper, Sunday-a chhuak thin kum 21 tlin lawmna chu Tourism, Sports leh ICT Department-te changtu Pu Robert Romawia Royte in a hmanpui.
Khuallian Pu Robert Romawia Royte chuan Lawhleng chanchinbu kum 21 tlin chu a lawmpui takzet thu sawiin kawng hrang hranga Media ti hmasawn turin sawrkar chuan theihtawp a chhuah zel dawn a ni, a ti a. Media mi te chu thu dik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a ni.
Khawvel hmun dangte ang bawkin Mizoramah pawh social media a chak tawh hle a, thu kimchang lo leh belhchian dawl lo, mipui rilru a diklo lama hruai thei te a darh nasa tawh em em a, hemi lakah hian mipuite kan fimkhura, social media hman thiam pawh kan inzir a tul takzet a ni, a ti a. Hei hian mipuiten hriatna kan lakna kan fimkhur a ngaih zia a ti lang chiang hle a ni tiin news rintlak ti chhuak thin tu newspaper te chhiar kan uar thar leh a, cable TV a news puan te kan ngaihthlak thin a tul hle a ni tiin mipuite pawh hemi kawnga tan la turin a chah bawk a ni.
Haulawng field leh volleyball court chu nuai 30 senga siam that thuai anih tur a puang nghal bawk a ni.
He huna khualzahawm MJA General Hqrs President Pu C.Lalrambuatsaiha chuan khawvelin Journalist te hi a ngai pawimawhin a ngai hlu em em a, 'The Fourth Estate' tih hiala koh niin kan ram inrelbawlna Democracy vawngnung zel turin an pawimawh takzet a ni, a ti a. Journalism chu hna hautak leh hahthlak tak a ni tiin social media chak tak karah journalist te pawh dikna tan tlat chunga investigative journalism lama hma la turin a chah a ni.
Vawiin program-ah hian MJA General Hqrs, MJA Lunglei, MJA Lawngtlai, MJA Hnahthial member-te bakah Haulawng leh a chhehvrl khua khawtlang hruaitute, tlawmngai pawl aiawhte leh sawm bik dangte an tel a ni.
Attachment
- Loading attachment...
