Vawiin khan Health Department buatsaihin Lawngtlai DC Conference Hall-ah Lawngtlai District chhunga ASHA worker-te tan nausen damlote enkawl zui dan inzirtirna hun (Sensitization Workshop on SNCU Discharged Infants Follow Up Programme) hman a ni a.

Lawngtlai DC Dr A. Muthamma chuan a hmanpui. Lawngtlai DC chuan ASHA-te chu hriselna kawnga a tak taka thawktu an nih avanga an pawimawh thu sawiin, tu pawh nu emaw naute emaw khawvela lo piang chhuak tawh phawt chu an hlu a, an nunna a hlut avangin an nunna veng turin theih tawp kan chhuah tur a ni, a ti a. Lawngtlai District-a naute thihna leh nau chunga nu thihna thleng thin pawh nasa taka a tlak hniam tawh thu sawiin, hei hi hriselna kawnga thawktute thawh rah a nih thu a sawi bawk.

He hun hi Lawngtlai District Chief Medical Officer Dr Thani Pachuau chuan a kaihruai a. Maternal and Child Health-a State Nodal Officer Dr Zochhuanawmi chuan nau piang hlim enkawl dan chungchang zirtirin, UNICEF-a State Consultant Dr Anil MH chuan PowerPoint Presentation hmangin zirtirna a pe a. UNICEF-a State Consultant Dr Vaibhravrao Patil pawhin ASHA-te hna thawh tawh dan sawi zauna hun leh thlir letna a neihpui bawk.

Lawngtlai District chhungah hian ASHA worker 178 an awm mek a. Tun tuma Workshop an buatsaihah hian worker 100 vel an tel thei a ni.