March ni 1, 2013 khan Mizote Kut Ropui ber Chapchar Kut chu Mizoram District dang te rual in Lawngtlai-ah pawh District Deputy Commissioner B.Lalhmingthanga'n KUT hi thlengin CYLA Playground ah hlawhtling taka neih a ni a. He hun hi Pu S.Laldingliana, Parliamentary Secretary chuan KUT PA niin a hmanpui a.

CHAPCHAR KUT hi  HLUKHLA KUT nen Lawngtlai-ah hian a ruala hman a ni a. He Hlukhla-Chapchar Kut hi zing dar 11:00 ah tan niin Area Baptist Choir, Lawngtlai ten Opening Song an sa a. Rev Lalbiaksanga Chinzah, E/S, BCM in hunserh a hman zawh hnu ah Kut Thlengtu Lawngtlai DC Pu B.Lalhmingthanga'n Inlawmna thu a sawi a. KUT PA Pu S. Laldingliana, Parliamentary Secretary in thuchah sawiin KUT hi a hawng ta a ni.

Thu sawiin Pu Dinga chuan CHAPCHAR KUT leh HLUKHLA KUT lo chhuah tan dan te, Heng kut te hi Mizo ten kan KUT nghahhlelh ber a nih thu leh Inremna Pual a ni serh leh ni bik a nih zia a sawi a. Pu Dinga chuan zu leh sa leh hlimhlawp bawlna satliah atana hmang lovin Lal Isua nen hlim takin Kut hi hmang ila, Kristianna nena inkalh thei thil he kutah hian a awm chuang lo va, Chuvangin Hlimna Ni atan i hmang ang u a ti. Pu Dinga chuan Chapchar Kut lo thleng hian Zo hnahthlak hnam hrang hrangte inkarah Remna leh In Unauna rawn thlen se a duh thu a sawi bawk a ni.

He Hlukhla-Chapchar Kut-ah hian Lawngtlai District huamchhunga YLA, MUP, LWA leh mimal eng emaw zat ten Hnam lam leh zai te bakah Mizo Culture pho lanna thil tam tak an entir a ni. He hunah hian HLUKHLA-CHAPCHAR KUT Miss atan Vanlalhruaitluangi, Lawngtlai Council Veng chu thlan a ni.