Vawiin khan Lawngtlai Additional DC Office Chamber-ah Lawngtlai District Consultative Meeting neih a ni a. Addl. DC Pu R.L Sangluaia’n he meeting hi kaihruaiin Lawngtlai District chhunga bank hrang hrangte hma lak tawhnate an thlir leta, an hmalak zel dan tur atana tha nia hriatte sawi ho a ni.

He Meeting ah hian Quarter ending hmasa a target an lo siam tawhte an ti hlawhtling tawk em tih en ho hmasak a ni a, Credit Deposit ratio ah (loan an pek chhuah per cent) bank tam zawk chuan target rate (norms rate) 60% an tlin laiin bank pakhat erawh chuan 8% chauh a pe chhuak a. A pe chhuak tha ber SBI chuan 256% lai a pe chhuak a, bank zawng zawng te CD Ratio zat chu 175% a tling. Agriculture Loan ah Norms rate 18% a nih laiin he dinhmun thleng pha hi an awm rihlo bawk a, a pe chhuak tha ber Mizoram Co-operative Apex Bank pawn 14% chauh a pe a ni. Bank tel zawng zawngte Deposit dawn zat chu Vaibelchhe 111.82 niin Advances erawh vaibelchhe 195.96 zet an nei thung.

Annual Credit Plan 2013-14 huam chhunga nikum 31.12.2013 thlenga Bank te hlawhtlinna rate chu Agriculture Advance ah 33%, Crop Loan ah 62%, Industries Sector ah 7%, Service Sector ah 21% leh Total Priority Sector ah 21% chauh a ni a.

Heng sector hrang hrangah te hian bank thenkhat 0% neite pawh an la awm a ni. KCC Target ah Bank te hian 40% tlin ang an nih laiin bank pakhat chu 0% a la ni a, kum kalta chhungin Mizoram Rural Bank chauhin Self-Help Group te hnenah tanpuina a pe chhuak bawk. Hengte bakah hian an target hrang hrangte sawi ho a ni bawk.

Meeting kaihruaitu Pu R.L. Sangluaia chuan Annual Credit Plan chhunga mi PMEGP leh SJSRY hnuaia tanpuina pek chhuah thu ah bank te chu thawk tha viau mahse hmasawnna tur tam tak a la awm nia a hriat thu sawiin bank te chu an chanpual te kokim taka pe chhuak thin turin a chah a, target dang dang sawrkar leh RBI in a siamte pawh nasa zawka ti hlawhtling turin a hrilh bawk.

Vawiina DCC Meeting hi SBI, Lead Bank Office Champhai buatsaiha neih a ni a, Lawngtlai hi Lunglei Lead Bank Office hnuaia awm ni mah se Lunglei-ah Lead bank Manager an awm remchan loh avangin Champhai Office hian a rawn buatsaih ta ni. DCC Chairman hi District Deputy Commissioner a ni a, mahse DC hi Election lam thilah tihtur pawimawh a neih avangin Additional DC hian a kaihruai a ni.