Vawiin Chawhma dar 11:00 AM khan Lawngtlai DC Conference Hall ah District Level Vigilance & Monitoring Committee neih a ni a, Chairman Pu C.L. Ruala, MP (LS) in a kaihruai.

Chairman Pu C.L. Ruala chuan thuhma sawiin District Level Vigilance & Monitoring Committee thupui chu Sawrkar atanga mipuite hamthatna tur sum lo kal te a nihna ang taka kan hman leh hman loh enfiah te, mirethei leh chanhai zawk ten an chanvo dik tak an chang em? tih hriatte a ni a, hei vang hian Department tin te hnathawh uluk takin kan enfiah thin a ni, a ti a. Member kalkhawmte chu thil tha zawk ni a an hriat te insum lova sawichhuaka kawng tha zawk hriat chhuah theih tum turin a fuih a ni. Hei bakah hian Mizoram chu MP pakhat bial a nih avangin leh District 8 lai kan neih bawk si avangin chak taka Monitoring kalpui a harsat deuh thu a tarlanga; Proforma mumal leh felfai zawk siamin tam zawkin Monitoring kalpui kan tum tawh dawn a ni, a ti bawk.

Co-Chairman Pu Ronald Sapa Tlau pawhin thu sawiin sawrkar hnathawktute chu an hnathawh hrechiang tur leh engtik lai pawh a enfiah ngam ni theuh turin a fuih a, Vigilance & Monitoring lamah chak zawka hma lak tum a nih thu a sawi bawk.

Vawiin a Vigilance & Monitoring Committee ah hian sawrkar hmalakna hrang hrang PMGSY, RGGVY, NRHM, MGNREGA. IWMP, IAY. DRDA leh BRGF hnuaia hmalakna kalmek te enho a ni a, siamthat ngai lai ni a an hriat te tarlangin chipchiar takin an sawi hova, Lawngtlai District huam chhung khuaa hmalakna thenkhat Lunglei lam atanga thawh ni si te enfiah chungchangah harsatna awm thei te chu meeting leh hun atang chuan a thawktute koh tel ve ni tawh se an ti.

Lawngtlai District Level Vigilance & Monitoring Committee ah hian Co-Chairman Pu Ronald Sapa Tlau, MP (RS) te, Minister of State for AH&Vety, Pu C. Ngunlianchunga te, Minister of State for Fisheries Dr. B.D. Chakma te, Parliamentary Secretary for H&TE, Pu H. Zothangliana te, Member Secretary Pu J. Hmingthanmawia Lawngtlai Bawrhsap te, LADC leh CADC CEM te bakah Member Department aiawh te kokim takin an tel a ni.