Vawiin hian Lawngtlai Superintendent of Police Conference Hall ah Fire Service Week 2015 hawnna inkhawm hman a ni a, Fire Service Week thuchah chhiar chhuahna leh thusawi ngaihthlakna hun hman a ni.

Fire Service Week, 14th April atanga 20th April, 2015 chhunga hman tur hawnna inkhawm hi Lawngtlai Sub Divisional Police Officer, Pu Tlualaisa in a kaihruaia, inkhawm kaihruaitu hian Director, Fire and Emergency Service Department hnen atanga Fire Service Week pual thuchah chhiar chhuak a. Thuchah chuan, mipuite chu ‘in chhuahsan dawn leh zan mut dawna kangmei tichuak thei chi enfel hmasa thin turte, Gas fimkhur taka hmanga, a leak phei chu hmang lo tur leh, Electric Wiring te a khat tawka enfiah fo turin a ngen a. Meichhemna hmanraw chi hrang hrang te chu him taka dah tha a, electric bungrua kan hman apiangte kan hman zawh veleh tha taka OFF thin turin a ngen a ni’. Thuchah a chhiar hnu hian Chairman hian kangmei thelhna kawnga Police te hmasawnna tur nia a hriatte tarlanna a nei a ni.

Thusawi tura sawm Lawngtlai District Information and Public Relations Officer, Pu K. Saitluanga pawhin thu sawiin, Kangmeiin kan chenna, kan rohlu, min thlahtute thil hlui kan chhawmte min kanral sak thin hi chu a pawi tak zet a. Kan inrinlohlaia lo thleng thin a nih avangin hlauhna leh thlabarna ten min chim zui bawk thin. He chhiatna rapthlak tak laka kan him theihnan a venna kawng kan uara, kan inzirtir nasat deuh deuh a tul tak zet a ni, a ti. Fire and Emergency Service Department te lakah mipuite kan pangchang hle a, hei vang hian Information and Public Relations Department leh Fire and Emergency Service lam pawh inhnaih leh zuala kan thawh ho deuh deuh a tula a hriat thu a tarlang tel bawk.

Fire Service Week hi kum 1944, April ni 14 a Indo lawnglian “Fort Stikine” a kangmei chhuak denchhenin kumtin kangthelhnaa Fire mi leh sa nunna chantate hriatreng nan India ram pumah hman chhoh tak a ni a. He Week in a tum ber chu kangmei laka kan him theihna tura invenna leh fimkhur nachang kan hriat theihna tura inzirtir a ni. India sawrkar chuan kumina Fire Service Week thupui atan hian “Kangmei laka I him theih nan: Inchhung bungraw tha leh a enkawl dan dik hmang rawh” tih thupui a ruahman a ni.

Attachment

  • Loading attachment...