Nimin leh vawiin khan Economics & Statistics Department bul tumin Lawngtlai DRO Conference Hall-ah Lawngtlai District chhunga LADC area-a piang leh thi chhinchhiahtu (registrar of births & deaths)-te tan intuaitharna buatsaih a ni.

Kum tina neih thin he annual training hi ni hnih awh niin, nimin khan RBD-te’n piang leh thi an chhinchhiahna register te endik leh kum thar atana hmanraw mamawh semin hun hman a ni a. Vawiin khan RBD chungchanga thil pawimawh hrang hrang zir ho leh sawi hona hun hman chhunzawm a ni.

Vawiina hun hman hi Economics & Statistics Department Director Pu Lalchhuanawma Hrahsel chuan kaihruaiin, an department-in piang leh thi chhinchhiah an kalpui dan leh kum kal ta report tlangpui a sawi a. Lawngtlai District Bawrhsap Dr Arun T., IAS chuan piang leh thi chhinchhiah pawimawhzia sawiin, ramria awm Lawngtlai District ang te tan phei chuan fimkhur a tul zual a ni, a ti a. RBD-te chuan an mawhphurhna pawimawhzia hre thar turin a chah.

Chief Judicial Magistrate Pu BT Lala Sakachep pawhin piang leh thi chhinchhiah kawngah kum khat chhunga chhinchhiahtir an nih loh chuan Judicial Magistrate 1st Class remtihna chauhva certificate pek chhuah theih a nih dan sawiin, court thlen ngai lo tura RBD-te leh mipuite’n a hun taka inchhinchhiahtir a pawimawh thu a sawi a. Kum kal ta (2017) chhung khan Lawngtlai District chhungah kum khat liam hnua inchhinchhiahtir tum eng emaw zat atangin mi 402 hnenah Magistrate 1st Class hminga phalna pek chhuah a nih thu a sawi.

Election Officer Pu Lalrinawma MCS pawhin piang hriatpuina lehkha (birth certificate) dik pawimawhzia sawiin, India khua leh tui nihna tichiangtu a ni, a ti a. Vote nei thei tur chin pawh birth certificate behchhan veka chhut leh enfiah an nih thin avangin, RBD-te’n certificate dik tak chauh an pek chhuah a pawimawh a ni, a ti.

Chawhma lama thu sawi hrang hrang ngaihthlak a nih hnu hian chawhnu lamah Lawngtlai District Research Officer Pi H. Chhunkungi chuan RBD kal khawmte hnenah thil pawimawh hrang hrang a zirtir a. Zawhna leh chhanna leh sawi hona hun hman ho a ni bawk.

Piang leh thi chhinchhiah hi Mizoramah kum 1985 atang khan bul tan a ni a. Tun dinhmunah Mizoram pumah piang leh thi chhinchhiahtu (RBD) 843 awmin, chu’ng zinga 103 chu damdawi ina mi an ni a. Lawngtlai District-ah RBD 132 awmin, chu’ng zinga 9 chu damdawi in atangin a ni a. Lawngtlai District hi LADC area leh CADC area-ah te then hran leh a ni a. LADC area-ah RBD unit 81 awmin, CADC area-ah unit 51 a awm.

Kum 1985 atang khan Birth & Death Annual Report hi kum tin tihchhuah thin niin, kum 2016 thleng khan vawi 31 tihchhuah tawh a ni a. Kum 2016 chhung khan Mizoram pumah nau piang 22,497 leh mitthi 6,422 chhinchhiah an ni a. Lawngtlai District bikah chuan nau piang mipa 1209 leh hmeichhia 1243, an zavaiin 2452 chhinchhiah an ni a; mitthi mipa 291 leh hmeichhia 198, an zavaiin 489 chhinchhiah an ni bawk.