Vawiin zing dar 10:30 khan Pu B. Lalhmingthanga, Lawngtlai DC chuan Prime Minister\'s Employment Generation Programme (PMEGP) hnuaia loan la tura thlan te puala Entreprenuership Development Programme a hawng a. EDP Training hi Lawngtlai leh Saiha district chhunga PMEGP loan dawng turte puala buatsaih ni 10 chhung (15-25th February, 2012) awh tura duan niin Govt. Lawngtlai College Hall-ah neih a ni a. KVIC Mumbai sponsor niin MKVIB Lawngtlaiin an huaihawt a, a hawnna hun hi Pu CL Sangchhawna, DVIO, Lawngtlaiin a kaihruai a ni.

Training hawnna thu sawiin Pu B. Lalhmingthanga chuan PMEGP hi lehkha thiam hna nei lo te tana National Flagship Programme a nih avangin Sorkar laipuiin a ngai pawimawh tih a sawi a. Hemi hnuaia loan la tur reng reng chu EDP training-ah hian tha taka an tel a ngai a, PMEGP hnuaiah hian EDP training zo thlap tan lo chuan margin money lak chhuah theih a ni lo va, Resource Person te pawhin theihtawp chhuahin an zirtir tur a ni a ti a. Thalai te\'n mahni inchawm theih leh mahni thawhchhuah ringa nun hi kan tum tur a ni a ti bawk.

Lawngtlai leh Saiha district puala EDP training ah hian mi 30 chuang telin, cheng nuai 2 hnuai lam dawng tur tan ni 3 leh cheng nuai 2 chung lam dawng tur tan ni 10 training buatsaih a ni a. Govt. Lawngtlai College Hall hi PMEGP atana sorkar duan sa a ni a. Training hawnnaah hian MKVIB, Lawngtlai leh DVIO, Lawngtlai staff te leh Govt. Lawngtlai College staff te an tel bawk a ni.