Vawiin hian Lawngtlai Superintendent of Police buatsaihin Lawngtlai khawchhunga Police awm zawng zawng te tan HIV/AIDS chung chang zir hona SP Conference Hall ah nei a ni a, Gilead Drop-in Centre atanga mithiam lo kal ten zirtirna an pe.
A hawnna inkhawmah thu sawiin Lawngtlai SP Pu Zosangliana chuan HIV/AIDS chung chang zir hona hi Mizoram Police Headquarters atanga ruahmanna an rawn siam anga neih a nih thu sawiin Lawngtlai District chhunga Police Department a thawktu zawng zawng te tan buatsaih duh viau mah ila tun dinhmunah chuan kan la thei chiah lova, HIV/AIDS chung changa kan mithiam ten rem an tih chuan District chhung hmun dangah pawh buatsaih zel kan tum zawk dawn a ni a ti. He hun hmang tur kalkhawm Police te chu SP hian uluk taka zir tur leh an hriatchian loh lai te zawt chianga tangkai pui ngei tum turin a fuih a ni.
A hawnna inkhawm hi Pu K.L. Vulmawia, MPS, Addl. SP in a kaihruaia, a ni hian Awareness Campaign an neih chhan leh a pawimawhna a tarlang a ni.
He hunah hian Mizoram State AIDS Control Society hnuaia mi Gilead Drop-in Centre, Lawngtlai atangin Nl. Lalkhawngaihdawngi, Programme Manager, Migrant Project leh a thawhpui mi 8 ten HIV leh AIDS chung chang zirtirna chipchiar takin an nei a ni.
