Vawiin hian Lawngtlai DC Conference Hall ah World Health Day leh Mission Indradhanush hawnna inkhawm a ruala neih a ni a, Lawngtlai Bawrhsap Pu J. Hmingthanmawia chu khuallian a ni.

Khuallian chuan Mizoramah kum 2007 atang khan District Health Society din tan a ni a, felfai tak chuan kum 2008 atangin an thawk tan. Kum 2008 atang hian kum tin World Health Day hi thupui thlanbik neia hman chhoh zel a ni a ti. Lawngtlai District mipuite an lo hrisel zawk nan hma lak chhoh zel niin tunhnai maiah pawh tui chawitute chu an tuichawiah tui tihthianghlimna pawlh vek tura hriattir an nih thu leh, a hmanrua pawh a thlawna pek an ni a ti a. Mipuite pawh chutianga tihthianghlim chauh chu lei duh turin ngen an ni a ti bawk.

Mission Indradhanush chu nikum maia Central sawrkar in a ruahman thar a nih thu leh he Programme in a tum ber chu naupang kum 2 hnuai lam zawng zawng te natna tlanglawn chi 7 danna Vaccine a bikima pek vek a nih thu a tarlang a, Lawngtlai District ah pawh thawh nghal tur niin thlaleh mai, May thla chhung hian District a khua zawng zawngte a thawhkhat nan tlawh chhuah nghal tuma hmalak a ni a ti bawk.

He inkhawmah hian Dr. Zothanpari Chhakchhuak, District Immunization Officer chuan a lem nena entirin vaccine inpek a pawimawh zia leh hma chhawp hrang hrangte a tarlang a. Lawngtlai District bikah thawktu indaihlohna leh inkalpawhna that tawklo vanga Vaccine pek mumal hleihtheihlohna khuate chu bitum zual bik an nih tur thu a sawi. Chutihlaiin zirtirna leh hriatna diklo avanga Vaccine pek duhlo tam tak an awm thin chuan harsatna a siam sak thin thu a tarlang bawk a, hetiang harsatna sutkian pui tur hian District huap tlawmngaipawl hrang hrangte chu thawhpuiah kan sawm a ni a ti.

India ramah naupang kum 2 hnuai lam zawng zawng 65% chauhten vaccine hi a bikima an lak theih avangin Sawrkar laipui chuan he Programme hi a siam thar a, Mizoram bikah hian tun dinhmunah naupang kum 2 hnuai lam 71% vel ten vaccine hi a kimin an la ve mek thung. He Programme bul tan nan hian ram chhunga District 201 thlanchhuah niin Mizoramah Saiha, Lawngtlai, Lunglei leh Mamit District te an tel a, State danga District thlanchhuah te rualin vawiinah hian he Programme hawnna hi neih a ni.

He inkhawm Dr. H.C Thangkima, Chief Medical Officer kaihhruaiah hian Ministry of Health and Family Welfare, Government of India atanga lokal Dr. Karunakar Singh pawhin thusawina hun a hmang bawk a ni.