4514/2025-2026

Lawngtlai, 18th February 2026: Vawiin khan Lawngtlai Bawrhsap Pu Donny Lalruatsanga hovin Bungtlang 'S' Block Immunization Committee - chuan BDO Office Chamber-ah thutkhawm an nei a. Pu Gilbert Lalhlimpuia, BDO Bungtlang 'S' chuan a kaihruai.

Pu Donny Lalruatsanga chuan kal khawmte hnena lawmthu sawina a nei hmasa a. Immunization lamah hmasawn zel turin theihtawp chhuah a tul hle a ti a. Tihdam aiin inven a tha tih tarlangin 'Vaccine' lak kawngah harh thar a tul hle a ni, a ti. Lawngtlai District - dinhmun thlirin hmasawnna tur tam tak awma ahriat thu sawiin, thahnem ngai taka thawk turin a sawm a ni. Tha taka thawhhona a awm chuan District- dang entawn tlak nih theih a ni tiin, khawtlang hruaitute thawhpuiah a sawm a. Lawngtlai District - in district dangte aia titha zawk turin Block Level Immunization Committee-te an pawimawh hle tih tarlangin, mahni block theuhah tha taka 'immunization' kalpui turin a chah. Faina leh thianghlimna kawngah District Level- ah ruahmanna kawng hrang hrang siam tawh niin, Block Level - ah pawh tha taka kalpui a tul dawn hle tih a sawi. Block hmasawnna turin sawrkar bakah VC leh NGO- te an pawimawh hle tih tarlangin, Pu Donny Lalruatsanga chuan District Administration -nena pheikhairual taka kalpuiah a sawm nghal bawk.

Thutkhawmah hian thil pawimawh tak tak sawiho a ni a. Dr. PC. Vanlalhlui, Consultant, WHO chuan World Health Organisation (WHO) hnathawh dan leh Immunization an kalpui dan tlangpui sawifiahna a nei a, Dr. Lalramchhana, MO, Bungtlang 'S' chuan Immunization- kalpui dan tlangpui, Vaccine- hnathawh dan leh pawimawhna sawizauna a nei a ni. Pi Lalnunhlimi, EM,WHO chuan Routine Immunization- kalpui tlangpui report pekna a nei bawk a ni.Thutkhawm chuan Vaccine - lâk kawngah hmasawnna tur tam tak a awm tih pawm tlangin, theihtawp chhuah thawhho zel ni se an ti a ni.

Vawiin thutkhawmah hian Bungtlang 'S' Block Immunization Committee Member- te an tel kim tha hle a, Pu Gilbert Lalhlimpuia chuan lawmthu sawina neiin hun a khar.