2044/2025-2026

Lawngtlai, 9th September 2025 : Vawiin khan Lawngtlai District AIDS Prevention Control Committee (DAPCC) chuan Intensive IEC Campaign 'India Fight against HIV/AIDS & STI' chungchangah DC Office Chamber-ah thutkhawm an nei a. Pu Donny Lalruatsanga, Bawrhsap leh Chairman, Lawngtlai District AIDS Prevention Control Committee (DAPCC) nibawk chuan thutkhawm hi a kaihruai.

Pu Donny Lalruatsanga chuan DAPCC member kalte hnena lawmthu sawina neiin, HIV/AIDS leh Sexually Transmitted Infection (STI) do na kawngah theih tawp chhuah zel a tul tak zet a ti a. Mizorama HIV/AIDS vei an tam lutuk chu veiawm a tih thu tarlangin, Ruihhlo do kawngah harh thar a pawimawh hle a ti. Bawrhsap chuan Ruihhloin chhungkua leh Khawtlang nun a nghawng dan ngaithuahin mitinin theihtawp chhuah a tul tawh hle a ti. Ruihhlo do kawngah mimal, chhungkua, NGO, Kohhran leh Sawrkarin theihtawp chhuah thin mahse, chawl lova thawh zel a ngai tiin, lungrual taka ke pen ho a zel turin a ngen a. Pu Donny Lalruatsanga chuan Lawngtlai District - atanga HIV/AIDS leh STI um bo a nih theihna tura theihtawp chhuah zel turin Lawngtlai mipuite, Tlawmngai Pawl, Village Council leh Kohhrante a sawm nghal a ni.

Dr. Remlalnghaki , Dy. CMO leh Member Secretary, DAPCC chuan report tawi pekna neiin Lawngtlai District chu HIV/ AIDS vei tam lamah 'Moderate Priority ' ah a awm mek a ti a. HIV/AIDS kai tamna ber chu hriau thinghlimlo in hmantawm a nih thu a sawi. HIV hrik kaite zingah ART lak duhlo tlem an awm thu tarlangin, hemi kawngah hian tan lak thar a tul hle a ti. IEC Campaign 'India Fight against HIV/AIDS & STI' hawn a nih hnuah khaw hrang hranga HIV /AIDS Test Drive - kalpui a nih tur thu a sawi bawk.

Thutkhawmah hian Lawngtlai District - a IEC Campaign 'India Fight against HIV/AIDS & STI' hawn dan tur chungchang rel a ni a. September Ni 17, (Wednesday) tlai lam dar 1:00 PM ah CYLA Hall, Lawngtlai -III, ah hawnna neih ni se tih a ni a. Chief Guest - atan Deputy Commissioner, Lawngtlai beisei niin, Resource Person atan mi pahnih ruat an ni a. Lawngtlai khawpui chhunga zirlai- High School, Higher Secondary School leh College atangin mi- 300 vel sawm ni se an ti bawk a ni.

Vawiin DAPCC thutkhawmah hian Member- te an tel kim tha hle a, Pu Donny Lalruatsanga chuan lawmthu sawina neiin hun a khar.