1536/2025-2026

Dated Lawngtlai,22nd September 2025: Vawiin khan Lawngtlai District Disaster Management Authority (DDMA) chuan DC Office Chamber-ah thutkhawm an nei a. Pu Donny Lalruatsanga, Bawrhsap leh Chairman, Lawngtlai District Disaster Management Authority, nibawk chuan thutkhawm hi a kaihruai.

Pu Donny Lalruatsanga chuan kalkhawmte hnena lawmthu sawina a nei hmasa a.Chhiatrupna (Disaster) lo thleng lakah nunna chân lo tur leh, thil tihchhiat a tam lohna turin inbuatsaihna tha a tul hle tih tarlangin, DDMA- te chu inrâlring renga awm turin a chah a. Mizoram chu tlangram a nih bakah ruahtui a dawng nasa tih tarlangin, Leimin leh chhiatna dang thleng thei lak a fimkhur thar turin mipuite a ngên a. Chhiatna lo thlen a hrilhriatna tur Incident Commanders / Zonal Officers - chu Lawngtlai District RD Block- pali leh Town area- ah te ruatfel an nih tawh thu tarlangin, mipuite chhawr tangkai turin a chah nghal bawk.

Thutkhawmah hian thil pawimawh tak tak sawiho a ni a. May ni 30, 2025 zân a Bazar veng leh Chanmari venga leimin avanga chhiatna tawkte hnenah state sawrkar atangin tanpuina sum (Relief) SDRF kaltlanga pek tawh ni mah se, an thil hloh te neih let leh nan a beitham hle tih pawm tlangin, Sawrkarlaipuiah 'Special Assistance' dil sak ni se an ti a. Leimin leh In chim thenfai hna thawh a nih theih nan DC Office, Lawngtlai leh MPWD tangkawpin Concept Paper leh Plan & Estimate- lo buatsaih se an ti a ni.


Lawngtlai District chhunga khuarel chhiatna thleng thut theia thawhhona ṭha zawk a awm theih nan leh chhiatna thleng chungchanga a rang zawka hma laka nih theih nan DDMA Lawngtlai chuan chak zawka hmalak ni se, hemi atan hian Lawngtlai District chhunga a fawng vuantute leh hma latute tan 'whatsapp group' pawh siam ni se an ti a. Lawngtlai District chhunga leimin avanga kawng kal tlang theihloh emaw vantlang kawng block- a awm a nih chuan a kawng viltu/siamtu department emaw company- chuan a rang thei ang berin kawng tihtlang hna an thawk tur a ni, an ti bawk. 



Vawiin thutkhawmah hian Lawngtlai District Disaster Management Authority (DDMA) Member -te an tel kim tha hle a, Pu Donny Lalruatsanga chuan lawmthu sawina neiin hun a khar.

Attachment

  • Loading attachment...