4739/2025-2026

Lawngtlai, 9th March 2026: Vawiin khan Lawngtlai District Sports Committee chuan an Chairman leh Bawrhsap nibawk Pu Donny Lalruatsanga kaihruaiin a Office Chamber-ah thutkhawm an nei.

Pu Donny Lalruatsanga chuan infiamna hrang hrang hruaitu lo kalte hnena lawmthu sawina a nei hmasa a. Infiamna kawng hrang hrangah hmasawn tura theihtawp chhuah a tul thu tarlangin, Member- te theihtawp chhuah turin a chah a. Sum leh pai (Promotional Fund) awm ang angte rualkhai taka hman thiam a pawimawh hle tih sawiin, Sports discipline hrang hrang tihhmasawn nan hman a nih tur thu a sawi a ni. Bawrhsap chuan sawrkar kum tharah project mumal tak neia hmalak a pawimawh thu tarlangin, hemi kawnga ngaihtuahna seng turin kalkhawmte a chah nghal bawk.

Thutkhawmah hian thil pawimawh hrang hrang sawiho a ni a. Promotional Fund - chu tha leh felfai taka hman ni se tih niin, Utilization Certificate - siam thin ni se an ti a. Sports Association- in hmalakna an neih ang angte thlalak leh video - te lakkhawm thin ni se, an ti a ni. Lawngtlai District - in infiamna lama rahbi thar a kai theih nan thawhhona tha zawk awm zel se an ti bawk a ni.

Sports Association- hrang hrang ten sum leh pai an mamawh dan tarlanna neiin, hnuaia mi ang hian pek an ni.

1. Lawngtlai District Football Association- ( Rs. 40,000)
2. Lawngtlai District Arm Wrestling Association- (Rs.30,000)
3. Lawngtlai District Basketball Association- (Rs. 20,000)
4. Lawngtlai District Taekwondo Association- (Rs. 30,000)
5. Lawngtlai District Badminton Association- (Rs.20,000)
6. Lawngtlai District Racing Association-(Rs. 20,000)
7. Lawngtlai District Chess Association - (Rs. 20,000)

Vawiin thutkhawmah hian Lawngtlai Distrcit Sports Committee Member - te an telkim tha hle a, Pu Donny Lalruatsanga chuan lawmthu sawina neiin hun a khar.