4795/2025-2026

Lawngtlai 12th March 2026: Vawiin khan Lawngtlai District Water & Sanitation Mission chuan an Chairman leh Bawrhsap nibawk Pu Donny Lalruatsanga kaihruaiiin DC Chamber-ah thutkhawm an nei a, Bawrhsap chuan 'Jal Mahotsav' hawnna a nei nghal.

Pu Donny Lalruatsanga chuan hlawk leh tangkai taka hman tura 'Jal Mahotsav' a hawn thu a sawi a. Jal Mahotsav' (Tui Kût) chuan Lawngtlai District - ah a tha zawnga ngawng a neih ngei a beisei tih a sawi a. tui hna siam leh tui renchem kawngah harh thar a tul hle tiin, Lawngtlai mipuite hemi kawnga theihtawp chhuah turin a chah a ni. Tui thianghlim tel lovin mihring tan khawsak a harsa hle tih tarlangin, tui thianghlim awm tura tui hna siam leh enkawl kawngah chak taka hmalak a tul hle a ni, a ti.

Bawrhsap chuan tui hna siam turin ramngaw humhalh a tul hle a ti a, a bik takin kangmei chhuak lo tura hmalak a pawimawh hle a ti. Ramngaw tihchereuin sik leh sa bakah tuihna a ti tlem nasa hle tih tarlangin, mipuite ramngaw humhalh kawngah bung thar kai turin a fuih a ni. Lawngtlai khawpui leh khaw dangah te tui thianghlim in tur tha zawk a awm theih nana theihtawp chhuah turin Department hotute a chah nghal bawk.

Jal Mahotsav (Tui Kût), hi kum tinin March ni 8 atanga 22nd March thleng hman thin a ni a. Kumin thupui atan hian “Gaon ka Utsav, Desh ka Mahotsav” (Village's festival, nation's festival) - Khawtlang Kût, Ram Kût ' tih thlan a ni.

Vawiin thutkhawmah hian Lawngtlai Distrcit Water & Sanitation Mission (DWSM) Member- te an tel kim tha hle a, Pu Donny Lalruatsanga chuan lawmthu sawina neiin hun a khar.