1902/2026-2027

Lawngtlai, 21st August 2026 : Vawiin khan Lawngtlai Bawrhsap Pu Donny Lalruatsanga kaihhruaiin DC Conference Hall-ah Independence Day Vawi - 80 na lawmna thlirletna neih a ni.

Pu Donny Lalruatsanga chuan kalkhawmte chibai bukin hlawhtling taka India Independence Day Vawi- 80 na lawm a ni chu thinlung taka lawmawm a tih thu a sawi a. Independence Day - puala 'Committee' peng hrang hrang, Parade Contingent, mawhphurhna pek bik te, sawrkar department - te inpekna leh an sum thawhkhawm te,  VC, NGOs, Kohhran leh chanchinbu mite  leh Lawngtlai mipuite inpekna fakawm a tih thu a sawi a. Khuallian Pu B. Lalchhanzova, Minister of State leh Pu C. Lalsawmzuala, CEM (LADC) te chungah lawmthu sawi bawkin Bawrhsap chuan India rama  ni pawimawh bik 'Independence Day' leh 'Republic Day' hlawhtling taka hman a nih zel theih nan a thawhpuiah a sawm nghal a ni.

Bawrhsap chuan Don Bosco School- te inpekna,  a bik takin an 'Brass Band' te fakawm a tih thu sawiin, an hnenah hian 'Certificate of Appreciation' a hlan nghal a ni.

Thutkhawm chuan kumin Independence Day hman dan a lungawithlak thawhkhat viau an ti a. Parade Contingent- tam zawk tel tura ruahmanna siam ni se, 'Live telecast'  chhunzawm zel ni se an ti a. Khuallian thusawi laia Parade Contingent - te tana thutna siamsak chu chin dan thaah ngaiin kum dangah pawh chhunzawm zel ni se tiin, Middle School chin chunglam te Independence Day leh Republic Day lawmnaa an kal vek theih  nan 'attendance' lak tawh  ni se an ti a ni. Independence Day leh Republic Day puala lawmman pek thin te chhunzawm ni se, lawmman dawng turte an kal ngei theih nan hmalak ni se an ti bawk a ni.

Vawiin Independence Day Vawi - 80 na lawmna thlirletna neihah hian Head of Department, LADC aiawh, Ex- Servicemen Association, Bank hotute, NGOs, MJA Lawngtlai leh Kohhran aiawhte an tel thei a, Pu Donny Lalruatsanga chuan lawmthu sawiin thutkhawm a khar.