934/2026-2027

Lawngtlai, the 10th June, 2026 : Vawiin chawhnu dar 2:30 PM khan Pu Donny Lalruatsanga, Chairman, District Sports Committee leh District Bawrhsap nibawk chuan tunhnaia 4th National Arm Wrestling &vPara Arm Wrestling Championship 2026 Rashtriya Raksha University, Gujarata neih zawh taka Mizoram aiawha kal Lawngtlaia Medal rawn hawnte thingpui a inpui.

Bawrhsap & Chairman, District Sports Committee ni bawk Pu Donny Lalruatsanga chuan, Lawngtlai District mai ni lo, Mizoram tana medal an rawn hawn thei chu chhuanawm a tih thu tarlangin an hlawhtlinnaah thinlung taka a lawmpui thu a sawi a. Arm Wrestling Association - chu Lawngtlaiah pawl naupangte angin lang mahse, National level thlenga Medal an rawn hawn thei thin chu player - te bakah hruaitute inpekna leh thawhrimna a ni, a ti a. Player - te chu tun aia dinhmun sang zawk thleng thei turin theihna an nei tih hriaa, hlawhtlinna sang zawk chang ngei turin theihtawp in chhuah zel turin a fuih bawk.

Pu Donny Lalruatsanga chuan sawrkar official- lam atanga intanpui theihna zawnah theihtawp chhuah zel a nih tur thu a sawi a. Chumi piah lamah pawh hruaitute pawhin mawhphurhna hriaa, theihtawp chhuah chhunzawm zel a tul hle a ti. Bawrhsap chuan an kal leh zelna turah duhsakna sang ber hlanin, Lawngtlai District atanga Medal rawn hawntute hnenah lawmpuina Rs 5,000 theuh hlan an nih tur thu a sawi a ni.

Mizoram aiawh fehchhuak Lawngtlai District atanga Medal rawn hawntute hi Vanlalduata Senior Mens (75 kgs) Bronze Medlist, T.Lalchhuanpuia, Seniors Mens (55 kg) Gold medalist leh Joshua C.Lalrindika, Para Youth Boys (65+ kg) Gold Medalist -te an ni a.

Vawiin hun hmannaah hian Lawngtlai District Sports Committee Sr.Vice President Pu Elvis Lalthangzuala pawhin thusawiin, infiammite'n hlawhtlinna an chan theihna tura hruaitute inpekna ropui a tih thu a tarlang a. Player - te chu an inpekna leh thawhrimnate Medal hmanga ti lang chhunzawm zel turin a chah bawk a ni.

Vawiin a 4th National Arm Wrestling & Para Arm Wrestling Championship 2026 Rashtriya Raksha University, Gujarata neih zawh taka District Sports Committee Chairman Pu Donny Lalruatsanga'n lawmpuina hun a hmanpui naah hian District Sports Committee - hruaitute bakah Arm Wrestling Association Lawngtlai District hruaitete pawh an tel a ni.