445/2025-2026

Lawngtlai, 3rd May 2025 : Vawiin khan Pu Cheemala Siva Gopal Reddy, IAS, Lawngtlai bawrhsap chuan IRCON ten Corporate Social Responsibility (CSR)  kaltlanga an sak tur Health Sub- Centre, Zochachhuah Lungphum a phum.

Pu Cheemala Siva Gopal Reddy,  chuan IRCON te hmalakna fakawm a tih thu tarlanglin lawm taka Health Sub- Centre sakna tur lungphum a phum thu a sawi a. CSR hmang tangkaina kawng hrang hrang zingah hriselna lama  hman a ni thin chu chin tha tak a ni, a ti. A bik takin ramri a awmten an chhawr tangkai dawn hle a, Zochachhuah leh a chhehvel khuate tan thil hlu leh tangkai tak a ni dawn a ni, a ti. Bawrhsap chuan  ram leh hnam hmasawnna tur a IRCON hmalakna chhuanawm a tih thu sawiin, hmalam hunah pawh tha taka thawk zel turin duhsakna a hlan a ni.

Pu Cheemala Siva Gopal Reddy chuan Zochachhuah Primary School - tlawh nghalin, School Buiding, Zirtirtu leh Zirlaite dinhmun a enfiah a. Harsatna an neih kawng hrang hrangah District Administration chuan theihtawp chhuahpui tur  thu a tarlang nghal bawk.