Nimin khan Lawngtlai District Bawrhsap Dr Arun T., IAS hovin Lawngtlaia sawrkar officer eng emaw zat chuan Lawngtlai District chhim lama Burma mi raltlan lo lutte chu a hmunah kal chilhin an dinhmun an en fiah a. An mamawh hrang hrang zir chiangin, hma lak zel dan tur an en ho nghal.
DC team chuan raltlanho inkulhna khaw li – Zochachhuah, Hmawngbuchhuah, Dumzautlang leh Laitlang te an tlawh a. He’ng khuaahte hian raltlante chu hmun khatah ko khawmin hriat tur pawimawh hrang hrang an hrilhfiah a. An hriselna ngai pawimawh tur te, zun leh ek thlahdah mai mai lo tur te, kut sil fai uluk tur te, chlorine nena sawngbawl sa tui thianghlim chauh hmang tur te, thosilen zar tha tur te’n an zirtir a. Raltlante khawsakna tur hmun, inthiarna tur hmun, an mutbu leh ei leh in leh mamawh tur hrang hrangte chu khawtlang hruaitute nen sawi hovin, hma lak dan tur an rel ho nghal a. Ramria awm Assam Rifles lam nen pawh inkawm hovin, state police te nen venhim hna thawhna kawnga hma lak zel dan tur te pawh sawi ho a ni bawk.
He’ng raltlante hi kar hmasa lama Myanmar leh Mizoram ramri bawr vela Burma hel pawl (Arakan Army) leh Burma sipaite an inkah vanga mahni khuaa awm ngam lova Mizoram chhunga lo tlan lut ta an ni a. Hel pawl leh Burma sipaite hi an la inkah deuh reng avangin an la haw thei rih lo a ni. Myanmar-a khaw pali – Varang, Pakauah, Phaleuah leh Satanguah atangin raltlante hi an lo lut a. Lawngtlai District-a khaw paliah inkulhin, VLA leh VC-te chhinchhiah danin hmeichhia 635 leh mipa 522, an zavaiin mi 1157 an ni. Zochachhuah-ah mi 250 (mipa – 110; hmeichhia – 140) awmin, Hmawngbuchhuah-ah mi 224 (mipa – 100; hmeichhia – 124), Dumzautlang-ah mi 240 (mipa – 105; hmeichhia – 135) leh Laitlang-ah mi 443 (mipa – 207; hmeichhia – 236) an awm.
District thuneitute chuan raltlante chhawmdawl hna hi an kalpui mek a. DC office atanga registration ti turin BLO leh VLA te’n raltlante chhinchhiah hna an kalpui dawn a. Raltlante hi registration number hran theuh pek vek an ni ang a. Hei hian ration pek dan turah leh raltlante thawn kir leh hun thlengin tangkaina a nei dawn a ni. Raltlante mamawh hrang hrang hi he inchhiarna mil zel hian pek a ni bawk ang.
State police leh Assam Rifles lamin a tir atangin venhim hna an thawk reng a. Health department lam chuan nimin khan Zochachhuah leh Dumzautlang-ah health clinic an buatsaih a. Damlo thisen test 29-ah malaria pf case 11 hmuh chhuah a ni. Hei bakah hian thosilen eng emaw zat semin, raltlante hriselna dinhmun hi enin an vil zui reng dawn a ni. PHE lam paw’n tui tihthianghlimna tur chlorine an sem bakah, ek in sakna tur hmanrua an ngaihtuah a, DC leh supply lamin buhfai, chawhmeh leh silpauline eng emaw zat an pe bawk.
He’ng raltlan tlawhnaah hian Lawngtlai Bawrhsap bakah, Lawngtlai SP Pu Lalsanglura MPS te; PWD Multi Modal Project Circle hnuai atangin SE Er J. Sangkhuma Khiangte, EE Er C. Lalhumhima, EE Er H. Lalnghinglova, SDO Er Joseph Laldintluanga leh SDO Er Perry Minho te; Health Department atangin Chief Medical Officer Dr Thani Pachuau, Chawngte CHC-a MO Dr Vanlallawma Khiangte, Bungtlang ‘S’ MO Dr Lawrence leh health worker te; PHE EE Er Laltlanchhunga leh a staff te; DC Office atangin Election Officer/DM&R Nodal Officer Pu Lalrinawma MCS leh thawktu dang te; Lawngtlai BDO Pu Zoramsiama Hmar, Bungtlang ‘S’ BDO Pu Victor Lalawmpuia leh Lawngtlai DIPRO Pu C. Lalhruaitluanga te; Bungtlang ‘S’ Supply Inspector Pu Vanlalhluna te; Lawngtlai O/C Inspector LP Zohmangaiha leh Mizoram Armed Police mi eng emaw zat an tel.
