337/2026-2027

Lawngtlai,30th April 2026 : Vawiin khan YLA Sangau Sub- Headquarters Conference vawi 2- na chu Sangau -III Community Hall- ah neih a ni a, Lawngtlai Bawrhsap Pu Donny Lalruatsanga chuan  khuallian ni a hmanpuiin, Pu F. Lalrothanga, President, CYLA chu khualzahawm a ni.

Pu Donny Lalruatsanga chuan YLA Sub-Headquarters Conference - a Khuallian tura sawm a ni chu lawmawm a tih thu sawiin, Conference chhimtu zawng zawngte chibai bukna a nei a. CYLA Conference, Cheurala neihah ' Ram leh hnam humhalh' puan a nih angin, a humhalh leh venhim kawngah tha thlah lo a thawh a tul tiin, theihtawp chhuah turin YLA Member- leh Laifate  a fuih a. Ram leh hnam dinchhuah leh hmasawnna turin mimal leh  Tlawmngai Pawl hrang hrangte an pawimawh hle tih tarlangin, ram leh hnam tana thahnem ngai taka thawk zel turin a chah a. Thalaite khawvel a nih tawh angin, thalaiten mawhphurhna an nei lian hle tiin,  a bik takin Laifate zingah ram leh hnam hmangaihtu tak tak  an lo  chhuah zel a beisei thu a sawi a. Ei leh bar kawnga intodelh tur te,  ram leh hnam siamthat kawngah leh hmasawnna turah Laifate harhthar a hun tawh tak zet tih tarlangin, YLA pawhin hemi kawngah hian chak zawka hmalak a tul hle a ni,a ti.  Mahni hnam ziarâng leh nihna humhalh lote an boral zel thin tih tarlangin, hnam ziarâng leh tihphung, tawng, leh  inthuamnate humhalh turin Laifaten mawhphurhna lian tak an nei tih sawiin, ram leh hnam ziarâng, hnam nihna leh tihphungte vawnghim zel tura  tan la thar theuh  turin a chah a ni.

Khuallian chuan  Lawngtlai District - Faina leh thianghlimna kawngah theihtawp chhuah mek niin ' Bawrhsap Award' kalpui  a ni a, heihian fiana kawngah District tan hmasawnna tha zawk a thlen mek a ni, a ti. Lawngtlaiin hmasawnna rahbi thar kai turin District Administration leh LADC- ten theihtawp an chhuah mek tih tarlangin 'Tho law dir tuah' kalpui tan mek a nih thu a sawi a.Ruihhlo do kawngah ' Drugs Free District Campaign ' kalpui tan niin, nimin lamah Sangau RD Block - ah kalpui tan a ni, a ti. Ram leh hnam eichhetu, nunna tam tak min laksaktu Ruihhlo do kawngah sawrkarin theihtawp chhuah mekin hemi kawngah hian VC,NGO, Kohhran leh mipuite tawiawmna tha a tul hle tih sawiin, thawhpuiah a sawm a. Lawngtlai District- in hmasawnna tluantling neia, district dangte entawn tlak ni tur leh ram leh hnam humhalh kawnga theihtawp chhuah zel turin Pu Donny Lalruatsanga chuan YLA Member leh mipuite a sawm nghal bawk.

Pu F. Lalrothanga chuan Sangau chu YLA dinchhuahna hmun anih angin, YLA tan chuan a hluin, hriatreng tlak a ni, a ti a. Lawngtlai District- hmasawnna turah YLA Sangau Sub - Headquarters ten nasa takin tha an thaw tawh tih tarlangin, hmalam hunah pawh theihtawpa tha thlah lo a thawk turin a chah a. Ram leh hnam humhalh,  dinchhuahna leh parchhuahna kawngah YLA - Member ten  tihtur pawimawh tak an nei tih sawiin, a bik takin YLA thiltum tihhlawhtlin kawngah theihtawpa thawh a ngai a ni, a ti. Ram ri humhalh leh venhim kawngah leh Ruihhlo do kawngah  YLA chuan theihtawp a chhuah mek zel tih tarlangin, hemi kawngah hian YLA chuan tha a thlah ngai dawn lo a ni, a ti. Lairam leh hnam tana mi tangkai zawk ni tur leh hmasawnna thelntu ni theuh turin kalkhawmte leh YLA- Member zawng zawngte a sawm  a ni.

Vawiin hun hmannaah hian  HSLC - a tithate hnenah lawmpuina thilpek hlan niin, Pu Jammy Vanhmingliana SDC chuan Power Point Presentation hmangin ' Drug Free District Campaign' kalpui dan leh hmalakna tur kawng hrang hrangte sawizauna a nei a. Pu LC. Chhanchunglian, President, YLA Sangau Sub- Headquarters chuan kalkhawmte lawmna thu sawiin, Pu. L.Z. Ringlawt, Secretary, YLA Sangau Sub- Headquarters chuan lawmthu sawiin hun a khar.