1241/2024-2025

Dated Lawngtlai, 19th July 2024 : Vawiin khan Lawngtlai District Bawrhsap Pu Cheemala Siva Gopal Reddy (IAS) chuan Zorinpui tlawhin, Zorinpui atanga Paletwa kawngpui laih hna thawkmek enkawltu  'IRCON International Ltd' hmalakna  leh hnathawh chinte a hmunah enfiah.

Pu Cheemala Siva Gopal Reddy (IAS) chuan Kaladan Multi Modal Transit Transport Project (KMMTTP) in Mizoram tana hmasawnna rahbi thar a thlen tur chu a taka hmuh a chakawm tawh hle a ti a. He kawngpui zawhfel a nih chuan sumdawnna lian zawk kalpui niin, Lawngtlai bakah Mizoram hmun hrang hranga chengte tan hmathatna tam tak a thlen dawn a, chhungkaw tam tak tan eizawnna  tha tak  a siam dawn a ni, a ti.  Hmasawnna tluan tling awm tur leh KMMTTP hlawkna tak tak tel turin a ram leilungfaten tun atanga rilru siam fel a tul hle tiin, chutiang lam hawia inbuatsaih a ngai a ni, a ti.

Bawrhsap chuan hmasawnna hnathawh tam tak a hun takah zawh a ni lo fo tih tarlangin hei hi a pawi hle a, a hun taka zo turin 'contractor' te an pawimawh hle rualin mipuite pawhin harsatna siam lo a, tha taka hna an thawh theihna tura kan thurualpui thiam a tul hle a ti. KMMTTP zawhfel a nih chuan Lawngtlai chu 'Dry port' tha tak a ni tawh  dawn tiin Lawngtlai mipuite harsatna siamtu ni lo a, hnathawktute tanpuitu ni zel turin a sawm a ni.

Pu Cheemala Siva Gopal Reddy chuan 'IRCON International Ltd' te chu neitu thinlungpu tur leh ram mipuiten an nghakhlel tawh takzet tih hriaa tha tak leh chak zawka hnathawk turin a chah a. An hnathawh kawnga harsatna an neih ang angte chu a hnena thlen tur leh District Administrator-a nih angin dan in a phal chinah hmalak zel a nih tur thu a hrilh a.  Tun dinhmuna IRCON International Ltd hnuaia thawkten hriselna lama harsatna an tawh mek sukiang turin '20th Battalion Assam Rifles, Zorinpui  te hnena 'medical checkup' an tih thin chu chhunzawm zel  tura ahrilh tur thu a sawi a. Mamawh an neih changa Lawngtlai an lo kal dawnin 'ID Card' Assam Rifles ten an pek chhuah thin chu chin tha tak a ni tiin, dan ang thlapa heng ID card- te pekchhuah anih chuan hnamdang an hnuaia thawkten eng harsatna mah an tawk dawn lo a ni, a ti. India leh Myanmar insumdawn tawnnna chu thil nghahhlelh awm tak a ni tih hria a, thahnem ngai taka thawk chhunzawm zel turin 'IRCON International Ltd' hotute a chah nghal bawk.

Pu Cheemala Siva Gipal Reddy hi Pu Nazish Akhtar, Deputy Project Engineer, (IRCON International Ltd)  leh a thawhpui ten an lo hmuak a. Pu Nazish Akhtar,  hian Zorinpui atanga Paletwa inkar kawng  109.2 Km  laih hna an enkawl  mek thu lo hrilhin, Contractor 11 an awm mek a ni, a ti. Tun dinhmunah fur ruahtui tlak tam lai anih avangin hnathawh a chak thei lo hle tih a tarlang bawk. Myanmar lama thuneihna kengkawh mektu -United League of Arakan (ULA) te nen thawhhona tha tak an neih thu bawrhsap hi lo hrilhin chawk zawka hnathawk tura hmalak mek a ni, a ti a. IRCON International Ltd hnuaia contractor-  ten chakzawka hna an thawh zelna tura an mamawh power supply tha zawk leh thil tul dangte chu ngaihtuahpui annih tur thu District Bawrhsap hian a hrilh a ni.

Zorinpui atanga Paletwa inkar kawngpui hi 'Two Lane' tur niin, ni 7, July 2022 khan IRCON International Ltd (Ministry of External Affairs) chuan hna an tan a, ni 6, January, 2026 ah zawhfel tura ruahman a ni a. Kawngpui 109.2 km a thui  bakah hian Culverts, Major & Minor Bridges, Bus Bay & Bus Shelter leh Truck Lay Bye-  te siam a ni dawn bawk.

Pu Cheemala Siva Gopal Reddy (IAS) chuan Bungtlang (South) BDO Office  tlawh tel bawkin, Self Help Group (SHG) puala training an lo buatsaih mek chu a chhim nghal a. Pu Samuel Lalmalsawma Sailo, BDO Bungtlang (S) leh a thawhpuiten an lo hmuak a ni.

Pu Collin Hlychho ( BDO), Pu Robert S. Beirosa (SDPO), Pu Dinesh Kumar Muhal, IAS (SDC) leh Pu  Zonunchama Ralte (DIPRO) te chuan Lawngtlai Bawrhsap hi an tawiawm a ni.